Լեդի Գագան ակամայից բացահայտեց հայերի, ռուսների և ադրբեջանցիների այսօրվա բարոյական հոգեվիճակը. VIDEO. PHOTO

Ինչպես հայտնի է, Լոս Անջելեսի «Dolby Theatre»-ում, որտեղ ավանդաբար տեղի է ունենում «Օսկար» մրցանակաբաշխությունը, օրերս կայացել է հայտնի հայ և ադրբեջանցի օլիգարխների երեխաների հարսանիքը, որտեղ բացի ռուսական շոուբիզնեսի ներկայացուցիչներից, մասնակցել է նաև Լեդի Գագան: Վերջինս անկեղծացել է, որ նման ճոխ պսակադրություն իր կյանքում չի տեսել:

Ամերիկացի փոփ աստղին զարմացրել է ծագումով հայ և ադրբեջանցի ռուս օլիգարխների շռայլությունը, ինչն ինքնին հասկանալի է, քանզի միացյալ նահանգներում մեծահարուստները կայանում են դժվար ճանապարհ անցնելով` ի տարբերություն Ռուսաստանի, Հայաստանի և Ադրբեջանի, որտեղ «բիրդա աղա» դառնալը պատահականության արդյունք է: Եթե քո ընկերը դառնում է նախագահ կամ վարչապետ, ապա դու կարողանում ես շատ արագ հարստանալ բացառապես վարչական ռեսուրսների օգտագործման հաշվին: Սակայն միայն դրանով չեն տարբերվում ամերիկացի մեծահարուստները հետխորհրդային մեծահարուստներից: Այս ամենի մեջ մեծ դեր է կատարում նաև մեր ժողովուրդների գիտակցական մակարդակը:

Բերենք ընդամենը մի քանի փաստ: Պաշտոնական տվյալներով Հայաստանի համախառն ներքին արդյունքը մոտ 10 մլրդ դոլար է: Իսկ մեկ շնչի համախառն ներքին արդյունքի ցուցանիշը կազմում է մոտ 3000 դոլար: Ադրբեջանում այդ ցուցանիշները կազմում են համապատասխանաբար 65 մլրդ դոլար և 6 հազար դոլար, Ռուսաստանում համախառն ներքին արդյունքը 1 տրիլիոն 300 մլրդ դոլար է, իսկ մեկ շնչի վրա համախառն ներքին արդյունքը կազմում է 9000 դոլար: Այսինքն, Հայաստանի, Ադրբեջանի և Ռուսաստանի ցուցանիշները իրենց համաչափությամբ իրարից շատ չեն տարբերվում: Հայերի կենսամակարդակը ադրբեջանցիներից 2 անգամ պակաս է և մոտ 3 անգամ պակաս է ռուսներից: Միացյալ նահամգներում այդ երկրի համախառն ներքին արդյունքը հասնում է 18 տրիլիոն դոլարի: Ա յսինքն, այդ երկրի տնտեսությունը Ռուսաստանից մեծ է մոտ 15 անգամ: Իսկ համախառն ներքին արդյունքը մեկ շնչի համար կազմում է մոտ 60 000 դոլար: Այսինքն, ամերիկացիների կենսամակարդակը հայաստանցիներից բարձր է 20 անգամ, ադրբեջանցիներից` 10 անգամ, իսկ ռուսներից` 6 անգամ:

Բայց արի տես, որ ամերիկացի օլիգարխները կամ մեծահարուստները իրենց այդպիսի շռայլություններ թույլ չեն տալիս, ինչը որ իրենց թույլ են տալիս հայ, ադրբեջանցի և ռուս օլիգարխները: Որովհետև ամերիկացի մեծահարուստները կայանում են իրենց անգլոսաքսոնական Մաքս Վեբերի նշած կապիտալիստական ոգու արժեհամակարգի արդյունքում, իսկ անգլոսաքսոնական հասարակությունը թույլ չի տալիս, որ իրենց երկրում հայտնվեն պատահական «բիրդա աղաներ»: Դրա համար էլ ամերիկացի միլիարդատերը գնահատում է իր աշխատած գումարի արդյունքը: Նա հասկանում է թե ինչ արժե իրականում իր աշխատած կապիտալը: Մինչդեռ հետխորհրդային «բիրդա աղան» չունի որժեքային համակարգ, և նրա կայանալու միակ մղումը չտեսությունն է, նա ինքնահաստատվում է իր վաղեմի երազանքների հաստատմամբ: Եվ քանի որ հետխորհրդային մեծահարուստը ըստ էության չգիտի իր փողի արժեքը, այդ պատճառով էլ զարմացնում է Լեդի Գագային, և հենց այդ պատճառով է, որ ամերիկյան փոփ աստղերը շատ են «սիրում» հետխորհրդային օլիգարխներին, որովհետև շատ լավ գիտեն, որ իրենց հավելյալ վաստակած փողը հետխորհրդային «բիրդա աղաների» չտեսության արդյունքն է:
Սա է իրականությունը:

Արտակ Հակոբյան