Քոչարյանը կարծում է, որ Փաշինյանը բավարարել է Թուրքիայի բոլոր նախապայմանները՝ Անկարայի հետ երկխոսելու համար

ՀՀ երկրորդ նախագահ Ռոբերտ Քոչարյանն այսօր իր ասուլիսի ժամանակ անդրադարձել է նաեւ առաջիկա հայ-թուրքական գործընթացի թեմային։ Քոչարյանի կարծիքով, հայ-թուրքական հարաբերությունների հաստատման հիմնական նախապայմանը միշտ եղել է Ղարաբաղի հարցը։ Թուրքիան միշտ պահանջել է, որ հայկական զորքերը դուրս բերվեն 7 շրջաններից, պաշտոնական Երևանը ճանաչի Ղարաբաղը որպես Ադրբեջանի մաս և հրաժարվի 1915 թվականի Հայոց ցեղասպանության միջազգային ճանաչման ակտիվ քաղաքականությունից։

Քոչարյանը հիշեցրեց, որ իր նախագահության օրոք ընդամենը 6-7 ամիս է Անկարան փորձել վերանայել Հայաստանին վերաբերող իր պահանջները, սակայն այդ փորձերը ոչ հաջողություն են ունեցել, ոչ էլ երկար կյանք։ Հավելենք նաև, որ Սերժ Սարգսյանի ժամանակաշրջանի «ֆուտբոլային դիվանագիտությունը» նույն պատճառով տապալվեց, քանի որ Թուրքիան վերջին պահին Արցախի մասով պահանջ էր ներկայացրել, որն արդեն համաձայնեցված փաստաթղթում բացակայում էր։ Եվ այս պատճառով էլ հայ-թուրքական գործընթացը կանգ էր առել։

«Հայաստանի և Թուրքիայի միջև հարաբերությունների հաստատման ներկա գործընթացը թափ է հավաքում միայն այն պատճառով, որ Թուրքիան, ըստ ամենայնի, դրական արձագանք է ստացել Երևանից Անկարայի բոլոր նախապայմանների կատարման վերաբերյալ»,-նշել է Ռոբերտ Քոչարյանը։

Հենց այս պատճառով է, որ Նիկոլ Փաշինյանը դեկտեմբերի 24-ի իր ասուլիսի ժամանակ «հող նախապատրաստեց», որպեսզի Հայաստանը հետագայում հրաժարվի Ադրբեջանի տարածքային ամբողջականությունից դուրս Արցախի կարգավիճակի համար պայքարից։ Հենց այս պատճառով է, ըստ Ռոբերտ Քոչարյանի, որ Թուրքիան ոգեշնչված է Փաշինյանի իշխանությամբ և պատրաստ է, եթե իր նախապայմանները կատարվեն, հարաբերություններ հաստատել Հայաստանի հետ։

Իդեպ, Ռոբերտ Քոչարյանի խոսքերը հաստատել են Թուրքիայի նախագահ Ռեջեփ Թայիփ Էրդողանի մամուլի քարտուղար Իբրահիմ Քալըմը, ով այս օրերին գտնվում է ԱՄՆ-ում և ամերիկյան քաղաքական վերնախավին տեղեկատվություն է ներկայացնում, որ «Փաշինյանի իշխանությունը համաձայնել է Արցախը համարել Ադրբեջանի մաս»։ Ուրիշ ինչ նպատակ է հետապնդում Ռեջեփ Թայիփ Էրդողանի մամուլի քարտուղար Իբրահիմ Քալըմի այցը ԱՄՆ, կպատմենք մոտ ապագայում։

 Սա՛ է իրականությունը:

Արտակ Հակոբյան