«Հայաստանին սիրահարված…». Ռոբերտ Վայցներ

«Հայաստանին սիրահարված…»
Ռոբերտ Վայցներ
Լուսանկարների ցուցահանդես

 Բացումը՝ հուլիսի 7-ին, ժամը 18։00-ին

Ամերիկացի լուսանկարիչ Ռոբերտ (Բոբբի) Վայցների՝ «Հայաստանին սիրահարված…» լուսանկարչական աշխատանքների ցուցահանդեսը հուլիսի 7-12-ը կգործի Ժողովրդական արվեստի կենտրոնում:

Հեղինակն այս ցուցադրությամբ փորձում է աշխարհին ներկայացնել Հայաստանը՝ այն երկիրը, որին սիրահարվել է տեսարան առ տեսարան, կադր առ կադր, որոնք ճանապարհ ցույց տվող ոտնահետքերի պես ուղղորդում են բացահայտելու Հայաստանի պատմամշակութային հուշարձանները, բնապատկերներն ու դրանցում ապրող մարդկանց:

Ցուցահանդեսի բացման օրը կհնչեն հայկական ժողովրդական մեղեդիրներ՝ դուդուկահար Արսեն Պետրոսյանի և քանոնահարուհի Սուսաննա Մանասերյանի կատարմամբ, կցուցադրվեն Ռոբերտ Վայցների կողմից «Դրոն» տիպի տեսախցիկով Հայաստանում նկարահանած տեսարաններ՝ թռչնաթև բարձունքից:

Հարգելի գործընկերներ, լուսանկարներն օգտագործելիս չի կարելի հեռացնել տարբերանշանը, և որպես աղբյուր պետք է նշել՝ Bobby Weitzner Productions /

Ռոբերտ (Բոբբի) Վայցներ

Ամերիկացի լուսանկարիչ է: Ծնվել է ԱՄՆ-ի Օհայո նահանգի Քլիվլենդ քաղաքում: Ավարտել է Քենթի պետական համալսարանի Սոցիոլոգիայի բաժինը:
Լուսանկարել սկսել է 12 տարեկանից: Մրցանակների արժանացած նրա լուսանկարները ցուցադրվել են ԱՄՆ-ում, Եվրոպայում և Մերձավոր Արևելքում: Ռոբերտ Վայցների աշխատանքները ներառվել են աստղագիտության, օվկիանոսագիտության, բնագիտության, էկոհամակարգերի և ճարտարապետական հետազոտությունների ոլորտներում: Վայցները ճանապարհորդում է ամբողջ աշխարհով՝ բացահայտելով կապույտ մոլորակի բազմաթիվ հեռավոր անկյուններ, առօրյայի մեջ գտնելով անսովորն ու անտեսանելին:

Ռոբերտը 2016 թվականից ճանապարհորդում է Հայաստանում։ Այժմ բնակվում է Երևանում։

Սիրահարված է մեր երկրին և իր հայուհի կնոջը: Ռոբերտն ու Աստղիկը ամենուր միասին են, տեսանկարահանում են Հայաստանի պոեզիան ու պատմությունը, հոգսն ու բերկրանքը, լեռն ու այգաբացը ...
«Սիրո հետքերով կամ Հայաստանին սիրահարված…». սա է ամերիկացի լուսանկարիչ Ռոբերտ (Բոբբի) Վայցների լուսանկարչական գեղագիտական երթուղին։

Հակիրճ տեղեկատվություն Կենտրոնի մասին
Հովհաննես Շարամբեյանի անվան Ժողովրդական արվեստի կենտրոնը ազգային մշակույթի այն եզակի օջախներից է, որի առաքելությունն է նյութական և ոչ նյութական մշակութային ժառանգության արժեքների պահպանումը, շարունակականության ապահովումն ու հանրահռչակումը:
Կենտրոնը ստեղծվել է 2011թ.-ին՝ Հովհաննես Շարամբեյանի անվան ժողովրդական արվեստի թանգարանի և Ժողովրդական ստեղծագործության և արհեստագործության կենտրոնի միավորմամբ:
Կենտրոնի Երևանի և Դիլիջանի մասնաճյուղի ժողովրդական արվեստի թանգարանների հիմքը կազմում են 1930-ական թվականներին ազգագրագետ, բանահավաք Հաբեթնակ Բաբայանի ջանքերով հիմնադրված Ժողովրդական ստեղծագործության տան ցուցանմուշները: Հավաքածուն (շուրջ 10.000 նմուշ) ընդգրկում է փայտի, մետաղի և քարի գեղարվեստական մշակման, ասեղնագործության, գորգագործության, խեցեգործության նմուշներ, ինչպես նաև ինքնուս նկարիչների գեղանկարներ: Հավաքածուում առանձնակի տեղ են գրավում սփյուռքահայերի նվիրատվությունները: Ժողովրդական վարպետների ստեղծագործությունները յուրատիպ մշակութային արժեքներ են, որոնք ներկայացնում են Հայաստանի պատմա-ազգագրական գրեթե բոլոր շրջանների ժողովրդական արվեստն ու նրա զարգացման փուլերը:
Կենտրոնում դասավանդվում են գորգագործություն, կարպետագործություն, ասեղնագործություն, ժանեկագործություն, փայտի գեղարվեստական փորագրություն և ազգագրական պարեր։