Թուրքիայի նախկին վարչապետ. «Հուսով եմ, որ Երևանը կօգտվի պատմական հնարավորությունից և այլևս չի ենթարկվի սփյուռքի անօգուտ հայտարարություններին»

Թուրքիան շարունակում է Հայաստանին սեփական պայմաններով «խաղաղություն» պարտադրելու ագրեսիվ քաղաքականություն վարել, և այս անգամ թուրք պաշտոնյաները որոշել են չսահմանափակվել «խաղաղության կոչերով», այլ հակադրել Հայաստանի դիրքորոշմանն այս հարցում հայկական սփյուռքի դիրքորոշմանը։ Փաստացի, Հայաստանին նոր նախապայման է առաջադրվում՝ դադարեցնել իր արտաքին քաղաքական օրակարգը հայկական սփյուռքի օրակարգի հետ ներդաշնակեցնել։

«Թյուրքական պետությունների կազմակերպության ստեղծման նպատակը ոչ թե սպառնալիքն է որևէ երկրի համար, այլ թյուրքալեզու պետությունների անվախության դրսեւորումը»։ Այս մասին հայտարարել է Թյուրքական պետությունների կազմակերպության Աքսակալների խորհրդի ղեկավար, Թուրքիայի նախկին վարչապետ Բինալի Յըլդըրըմը «Շուշա (Շուշի- Zham.am). մենք միասին ենք անցնում այս ճանապարհներով» գրքի շնորհանդեսին, հայտնում է թուրքական ANADOLU գործակալությունը:

Թուրքիայի իշխող կուսակցության անդամը գիրքն անվանել է կարևոր փաստաթուղթ «Հայաստանի 30-ամյա «օկուպացիայից» Ադրբեջանի հողերի ազատագրման վերաբերյալ»։ «Համերաշխության և համատեղ քայլերի շնորհիվ Ղարաբաղի վրա կրկին ծածանվում է Ադրբեջանի դրոշը։ Հուսով եմ, որ 44-օրյա պատերազմը կլինի վերջինը տարածաշրջանում, և մարդիկ այլևս չեն բախվի նման դառնությունների։ Այս գործընթացում շատ բան կախված է Հայաստանից, որն առաջնորդվում էր երևակայություններով, դատարկ գաղափարներով»,- ասել է Բինալի Յըլդըրըմը։

Յըլդըրըմը նշել է, որ Թուրքիան և Ադրբեջանը այսօր խաղաղության ձեռք են մեկնում Հայաստանին՝ քարոզելով Հարավային Կովկասում կայունություն և զարգացում։ Նա հույս հայտնեց, որ «Երևանը կօգտվի պատմական հնարավորությունից և այլևս չի ենթարկվի սփյուռքի ու այլ երկրների անօգուտ հայտարարություններին, որոնք միայն բանավոր են աջակցում Հայաստանին»։

«Հարավային Կովկասի բարգավաճումը կախված է բարիդրացիության սկզբունքների հանդեպ հարգանքից։ Հայ ժողովուրդը տարիներ շարունակ տառապում է մեկուսացումից։ Եկել է համագործակցության ժամանակը»,- ​​ասել է նա։

Zham.am