Քաղաքապետի մամուլի խոսնակը չի մեկնաբանում Մարությանի պաշտոնանկության գործընթացը

Ընդհանրապես ավագանու իրավասությունն է Երևանի քաղաքապետին անվստահություն հայտնելու գործընթաց նախաձեռնելը, որն իհարկե ես չեմ մեկնաբանի։ Այս մասին 24News-ին ասաց Երևանի քաղաքապետ Հայկ Մարությանի մամուլի խոսնակ Հակոբ Կարապետյանը։

Երեկ 24News-ը, հղում անելով իր աղբյուրին, գրել էր, որ Երևանի քաղաքապետ Հայկ Մարությանն ամենայն հավանականությամբ առաջիկա 10 օրվա մեջ պաշտոնանկ կարվի։ «Քաղաքապետարանի ավագանու 60 անդամից մոտ 48-ը համապատասխան ստորագրություն են հավաքել, ընդ որում, ոչ միայն իշխանական խմբակցությունից»։ 

Հակոբ Կարապետյանը խնդրեց այս թեմայով մեկնաբանություն վերցնել ավագանու անդամներից։ «Թո՛ւյլ տվեք իմ վերաբերմունքի մասին չխոսել, դուք ասեցիք, որ հնչել է 39 թիվը, կարծեմ՝ ձեր կայքում գրված է, թե իբրև 48 ստորագրություն է հավաքվել, մի ուրիշ տեղ կարդացել էի, որ 37 ստորագրություն է հավաքվել, իսկ մի ուրիշ աղբյուր ասում է, որ 14 ստորագրություն է հավաքվել», - հավելեց խոսնակը։ 

Կարապետյանը հրաժարվեց խոսել այս գործընթացի նկատմամբ Հայկ Մարությանի վերաբերմունքի մասին։

«Անհրաժեշտ 33 ստորագրությունից ավելին՝ նախնական տվյալներով 39-ն արդեն կա», - երեկ «Ազատությանն» ասել էր Երևանի ավագանու իշխող «Իմ քայլը» խմբակցության անդամ, Շուկայի վերահսկողության տեսչական մարմնի ղեկավար Արմեն Կոտոլյանը։

Հիշեցնենք, որ երկար ժամանակ է, ինչ խոսվում է Հայկ Մարությանի և Նիկոլ Փաշինյանի լարված հարաբերությունների մասին։ Եվ որ վերջինի «քավորությամբ» է սկսվել Մարությանին պաշտոնանկ անելու գործընթացը։ 

Դեկտեմբերի 12-ին Փաշինյանի ընտանիքին պատկանող «Հայկական ժամանակ» կայքը գրել էր, որ պատերազմի ավարտից հետո Հայկ Մարությանը դիմում է ներկայացրել «Քաղաքացիական պայմանագիր» կուսակցությունից հեռանալու մասին և խզել հարաբերություններն իշխող ուժի անդամների հետ, Սեյրան Օհանյանի միջնորդությամբ հանդիպել է Ռոբերտ Քոչարյանի հետ։ Հանդիպման մասին տեղեկությունը քաղաքապետի խոսնակը հերքել էր։