Շատ մեղքեր ունեմ, շատ եմ ուտում. Րաֆֆի Հովհաննիսյան (տեսանյութ)

«Ժառանգություն» կուսակցության նախագահ Րաֆֆի Հովհաննիսյանն այսօր լրագրողների հետ հանդիպմանը խոստովանեց, որ շատ մեղքեր ունի։

«Ես շատ մեղքեր ունեմ, շատ եմ ուտում, շատ եմ խմում, ժպտում ու սիրում, այսօր Արմենուհու ու իմ ամուսնության 32-րդ տարեդարձն է, մարդիկ ինձ մոտենում ու ասում են՝ «ինչ զոհողություն արեցիր, Հայաստան եկար 27 տարի առաջ, երբ կարող էիր փաստաբան լինել, Խաղաղ օվկաինոսի վրա մեծ վիլլա ունենալ», – ասաց Րաֆֆի Հովհաննիսյանը՝ հավելելով, որ հիմնական զոհողություն կրողն Արմենուհին է։

Րաֆֆի Հովհաննիսյանն արձագանքել է նաև «Ելք» խմբակցության պատգամավոր Արամ Սարգսյանի դիտարկումներին՝ արդյո՞ք թավշյա հեղափոխություն անելու ընթացքում հնարավոր է, որ Րաֆֆի Հովհաննիսյանը կրկին որոշի գնալ առ Աստված աղոթելու, ինչպես դա արեց 2013-ի նախագահական ընտրություններից հետո,  և նշել, որ նախընտրում է աղոթել եկեղեցում, տաճարում, իր տանը, Ծիծեռնակաբերդում, քան` 10 զոհ տալ, հետո տուն գնալ:

«Մինչ օրս ոչ Լևոն Տեր-Պետրոսյանը, ոչ Ռոբերտ Քոչարյանը, ոչ էլ Սերժ Սարգսյանը չեն հարցաքննվել Մարտի 1-ի ահավոր ողբերգության պահով, ոչ էլ ես, որ այդ օրը որպես ԵԽԽՎ պատվիրակության անդամ գտնվում էի Պետերբուրգում և մարտի 2-ին հասա, այցելեցի ում կարողացա, այդ թվում՝ Արմեն Մարտիրոսյանին, ով ևս դաշույնով հարված էր ստացել։ Ես խնդիր չունեմ այսօր կամ ընդհանարապես որևէ մեկի մոտ միավոր ստանալու՝ լավ խոսեց, թե՝ ոչ: Եթե պետք է մտածենք ապագայի մասին, Արամ Զավենի Սարգսյան, իմ լավ ընկեր, և որ գալուց Նիկոլին հանդիպեցի պատահմամբ, ասեցի, որ ես ավելի լավ ընկեր եմ Արամին, քան՝ դու։ Եվ ասում եմ Արամին, որ դեռ պետք է կանգնենք միասին ապագայի համար, սենց չենք կանգնելու, կամ պիտի կանգնենք՝ ամեն մեկն իր մեղքը, իր հետագիծը, իր տալիքը տալով, բայց թող ոչ մեկը ոչ մյուսի դատավորը չլինի։ Ես միշտ կաղոթեմ, դու էլ կաղոթես, Արամ, և միասին եթե գործենք, և պիտի՛ գործենք, մեր եղանակը պետք է փոխենք»։

 Zham.am