«Հայկական դրոշի» սիրահար Փաշինյանը վիրավորված չէ՞ այն փաստից, որ Ադրբեջանում մարդիկ ոտքերը սրբում են մեր դրոշի վրա. Տեսանյութ

Ադրբեջանում հայատյացությունը պետական ​​քաղաքականություն է, կամ գրեթե կրոն, 44-օրյա պատերազմում մեր պարտությունը միայն ամրապնդեց այդ զգացմունքները և «Ադրբեջանին թեւեր» տվեց: Հայաստանի և հայերի նկատմամբ ատելությունը շարունակում է դրսևորվել տարբեր ձևերով։

Հետաքրքիր է, որ ադրբեջանական փորձը՝ հայկական դրոշը տեղադրել մարդաշատ վայրում, որ այն տրորեն, նիկոլականների կողմից անպատասխան է մնացել։ Շատ հետաքրքիր է, որ «հայկական դրոշի սիրահար» Նիկոլ Փաշինյանը չի էլ մտածել ադրբեջանական այս ֆլեշմոբին պատասխանել, և ստիպված, հայ ժողովրդի ու Փաշինյանի թասիբը պահել են Նիկոլի կողմից ատելի ղարաբաղցի ֆուտբոլիստները, նույն կերպ պատասխանելով թշնամուն:

Իհարկե, սա շատ տհաճ երեւույթ է, և նույնիսկ թշնամի պետության դրոշը տրորելը դա խաղ է ողջ ժողովրդի արժանապատվության հետ, բայց երբ Ադրբեջանում հայկական դրոշն այս կերպ ծաղրում են, ապա դրան չարձագանքելը նույնպես անմեղսունակության և պատվի ու արժանապատվության պակասի նշան է:

Իր վերջին հարցազրույցում Նիկոլը հայտարարեց, որ «իր համար որպես վարչապետ ամենամեծ հարվածն այն էր, որ մաքսավորը անտեսում էր Հայաստանի դրոշը, այն պահեով ոչ պատշաճ վիճակում»։ Մի կողմ թողնենք այս պաթոսը, մանավանդ որ նրա համախոհները 2018-ին նույն դրոշի վրա բլոտ էին խաղում, բայց ադրբեջանական այս ֆլեշմոբը պետք է լրջորեն զայրացներ Փաշինյանին և նրա «քարոզչամեքենան» արդեն պատասխան ֆլեշմոբ պետք է պատրաստեր, բայց, ցավոք, Փաշինյանն իրեն նվաստացած չի համարում, երբ Ադրբեջանում կամ Թուրքիայում տրորում են հայկական դրոշը, ինչի համար էլ ոչ ինքը, ոչ իր թիմն ի պատասխան ֆլեշմոբով հանդես չեն եկել։ Եվ, բարեբախտաբար, ղարաբաղցի ֆուտբոլիստները փրկեցին մեր պատիվը։