Մխիթարյանը չի մասնակցի ԲԿՄԱ (Սոֆիա)-«Ռոմա» խաղին

Հայաստանի ազգային հավաքականի և «Ռոմայի» կիսապաշտպան Հենրիխ Մխիթարյանը բաց կթողնի Կոնֆերենցիաների լիգայի խմբային փուլի 6-րդ տուրի՝ Սոֆիայի ԲԿՄԱ-ի դեմ խաղը։ Հռոմեացիների գլխավոր մարզիչ Ժոզե Մոուրինյուն որոշել է հանգիստ տրամադրել Մխիթարյանին, ինչպես նաև Ռուի Պատրիսիուսին և Քրիս Սմոլինգին։ Այս մասին Մոուրինյուն պատմել է Sky Sport-ին տված հարցազրույցում․

«Գիտենք, թե ինչ դժվարությունների առաջ ենք կանգնում նման մեծ քանակի վնասվածքների պատճառով, և գիտենք, որ յուրաքանչյուր խաղացողի երբ կորցնում ենք, աղետ է։ Մենք սպասում էինք դժվարությունների, բայց COVID-ը, վնասվածքներն ու որակազրկումներն արդեն չափից դուրս են։ Ամեն դեպքում, մենք պետք է ինչ-որ մեկին հանգստի հնարավորություն տանք։ Ռուի Պատրիսիուն, Մխիթարյանն ու Սմոլինգը մեզ հետ չեն մեկնի ԲԿՄԱ-ի դեմ խաղին»,- ասել է պորտուգալացի մասնագետը։ ԲԿՄԱ-«Ռոմա» խաղը կկայանա այսօր՝ դեկտեմբերի 9-ին, Բուլղարիայի մայրաքաղաքում։