Ադրբեջանը և Իգդիրը կապող մայրուղին կանցնի Հայաստանով. Էրդողան

Թուրքիայի նախագահ Ռեջեփ Թայիփ Էրդողանն ամփոփել է Աշխաբադ կատարած այցի և «Թյուրքական պետությունների կազմակերպության» գագաթնաժողովին մասնակցության արդյունքները: Այս մասին հայտնում է թուրքական «Star»-ը: 

Ըստ Էրդողանի, «բոլոր ղեկավարները շատ ջերմ են վերաբերվում «Թյուրքական պետությունների կազմակերպության» նոր ձևավորմանը»:

«Իհարկե, կային անհանգստացողներ։ Չեմ կարող ասել, որ դա անհանգստացրել է Ռուսաստանին։ Ուրբաթ օրը մեր եղբայր Իլհամ Ալիևն ու Նիկոլ Փաշինյանը հանդիպեցին Ռուսաստանում՝ պարոն Պուտինի նախագահությամբ։ Այս բանակցությունների շուրջ մեր զրույցի ժամանակ եղբայրս՝ Իլհամ Ալիևն ասաց, որ հանդիպումը դրական և արդյունավետ է եղել։

Լուծվել է Արաքս գետի երկայնքով երկաթուղու և ճանապարհի կառուցման հարցը: Օրակարգում ավտոճանապարհի կառուցումն է, որը նույնպես կանցնի Հայաստանի տարածքով՝ մինչև Իգդիր։ Երթուղին առաջին հերթին թույլ կտա լուծել Նախիջեւանի խնդիրը, իսկ մյուս կողմից՝ այն շատ հաջող քայլ կդառնա Ադրբեջանը Իգդիրի հետ կապելու ուղղությամբ։ Սրան զուգահեռ կարևոր քայլ է արվելու նաև մարդկանց և բեռների փոխադրման ոլորտում՝ ինչպես ավտոմոբիլային, այնպես էլ երկաթուղային տրանսպորտով։

Ավելի վաղ մենք առաջարկել էինք ձեւավորել «3+3» հարթակը։ Այս հարթակը կարող է ներառել Ռուսաստանը, Թուրքիան, Ադրբեջանը, Հայաստանը, Իրանը, իսկ աջակցության դեպքում՝ Վրաստանը։ Այս հարթակը կդառնա տարածաշրջանում խաղաղության ձգտման վառ ապացույցը, և մենք իմացանք, որ կան դրական քայլեր այս ուղղությամբ»:

Zham.am