Հիմա 20-ից ավելի բերման ենթարկվածների հարցերով ենք զբաղված․ Արա Զոհրաբյան

Հիմա բերման ենթարկվածների հարցերով ենք զբաղված, ժամը 17։00-ին լինելու ենք Հանրապետության հրապարակում՝ մեր պահանջը ներկայացնելու կառավարությանը։ Այս մասին 24News-ին ասաց «Զարթոնք» ազգային քրիստոնեական կուսակցության գործադիր մարմնի պատասխանատու, Փաստաբանական դպրոցի կառավարման խորհրդի նախագահ և տնօրեն Արա Զոհրաբյանը։

Ավելի վաղ Զոհրաբյանը և մի խումբ ակտիվիստներ փակել էին Երևանի մի շարք փողոցներ` քաղաքացիների ուշադրությունը հրավիրելով Հայաստանի շուրջ առկա խնդիրների վրա։

Հարցին՝ փողոց փակելով ի՞նչ արձագանք ստացան բնակչությունից, Զոհրաբյանը պատասխանեց․ «Դե պարզ է, բնակչությանը դա անհարմարություն է պատճառում։ Խնդիրն այն է, որ մենք ուզում ենք ուղղակի բնակչությանը կոչ անել՝ տեր կանգնելու երկրին, որովհետև դրսից գերտերությունները կամ մեր հակառակորդ պետությունները երբ բանակցությունների սեղանին չեն տեսնում ժողովրդի զայրույթը կամ եռալն այս խնդիրների վերաբերյալ, բնականաբար, մեր իշխանությունների առջև կոշտ պահանջներ են դնելու»։

Ըստ «Զարթոնքի» ղեկավարի՝ գոնե այն մարդիկ, որոնք այսօր իշխանություններին հավատում են, այդ մարդիկ էլ պետք է ոտքի կանգնեն, որ գոնե իրենց ընտրած իշխանությունը գնա, ավելի համարձակ ու վճռական լինի բանակցությունների դաշտում։

«Մենք միասնականության կոչ ենք անում։ Մենք ուզում ենք բոլորով կանգնել, մեր երկրին տեր լինել․ սա է մեր պահանջը», - հավելեց նա։ 

Ըստ Արա Զոհրաբյանի՝ իրենց այս ակցիան կապված է նաև դեկտեմբերի 15-ին Բրյուսելում Արևելյան գործընկերության շրջանակում նախատեսված Ալիև-Փաշինյան հանդիպման հետ։

«Ոչ միայն դա, մենք տեսնում ենք, որ նաև սահմանում վիճակը լարված է։ Մենք մտահոգություն ունենք, որ առաջնագիծը պատշաճ, լիարժեք ապահովված չէ և՛ մարդկային, և՛ տեխնիկայի ռեսուրսներով։ Այսօր աշխարհազորը նորմալ չի ձևավորվել։ Եվ չունենք զինված աշխարհազոր, որ մարտական գործողությունների դեպքում գնա, պաշտպանի մեր սահմանները։ Մենք այդ տիպի պահանջներ ենք ներկայացնում կառավարությանը», - ընդգծեց նա և հավելեց, որ, իր տեղեկությունների համաձայն, մինչև 20 հոգի բերման է ենթարկվել։ 

Ոստիկանության փոխանցմամբ ակցիայի մասնակիցները բերման են ենթարկվել բաժիններ՝ Վարչական իրավախատումների մասին օրենսգրքի 182 հոդվածով նախատեսված գործողություն կատարելու համար (Հասարակական կարգի պահպանության, հասարակական անվտանգության ապահովման, օբյեկտների պահպանության պարտականությունները կատարելու ընթացքում ոստիկանության զորքերի զինծառայողի կամ ոստիկանության ծառայողի օրինական պահանջը չկատարելը):