Զանգեզուրի միջանցքը բացառվում է, բայց ճանապարհների ապաշրջափակում՝ խնդրեմ. Հովիկ Աղազարյան
Այսօր առավել քան ակտիվ են ադրբեջանական տելեգրամյան ալիքները: Նրանք հայտնում են այն մասին, որ առաջիկայում սպասվում է 2 փաստաթղթի ստորագրում. դրանցից մեկը՝ վերաբերում է Զանգեզուրի միջանցքին, մյուսն էլ սահմանազատմանն ու սահմանագծմանը:
Այս թեմայով ԼՈՒՐԵՐ.com-ը զրուցեց իշխանության անդամներից մեկի՝ Հովիկ Աղազարյանի հետ: Նա վստահորեն հայտնեց, որ միջանցքի հետ կապված որևէ փաստաթուղթ երբեք չի ստորագրվելու. «Ինչ վերաբերում է սահմանազատմանն ու սահմանների ճշգրտմանը, ապա սպասելի փաստաթուղթ է, բայց չեմ կարող ասել, թե երբ կլինի: Բացառում եմ Զանգեզուրի միջանցքի վերաբերյալ որևէ փաստաթղթի ստորագրում, սակայն ճանապարհների ապաշրջափակում՝ խնդրեմ»,- նշեց Հովիկ Աղազարյանը:
Վերջինս կարծում է, որ Ադրբեջանի հետ հարաբերությունները կարգավորելու միակ ելքը «ինչ-որ» փաստաթղթի ստորագրումն է, և այն էլ, որքան շուտ, այնքան լավ. «Մենք Ադրբեջանի հետ հիմա, մեղմ ասած, գտնվում ենք շատ ծանր հարաբերությունների մեջ, որոնք երբեմն-երբեմն թելադրում են այս կամ այն պահին ինչ-որ փաստաթղթի ստորագրում, որքան շուտ լինի դա, այդքան լավ, մեկնընդմիշտ խնդիրները կլուծվեն»,- ընդգծեց Հովիկ Աղազարյանը:
Նա ընդդիմադիր գործընկերներին խորհուրդ տվեց դադարեցնել «բախտորոշումներ» անելը և անհամբերությամբ չսպասել այս կամ այն փաստաթղթի ստորագրմանը, որն, ինչպես նշեց նա, այսպես թե այնպես լինելու է. «Մեր ընդդիմադիր գործընկերների մարգարեական, այսպես կոչված, բախտորոշումները կապված փաստաթղթի ստորագրման հետ խորհուրդ կտամ դադարեցնել: Է՜, մի օր ինչ-որ մի բան պիտի ստորագրենք սահմանների ճշգրտման և սահմանների գծման գործընթացը սկսելու համար. այսօր չստորագրվի, վաղը կլինի»,- ասաց պատգամավորը՝ հավելելով, որ առանց այդ փաստաթղթի հնարավոր չի լինի հրադադարը վերածել խաղաղության:
Հովիկ Աղազարյանը վստահ է՝ այդ փաստաթղթի ստորագրումը ամբողջովին այլ իրավիճակ կստեղծի մեզ համար. «Եթե մենք սահմանի խնդիրը լուծենք, ապա հնարավորություն կստեղծվի հրադադարը վերածել խաղաղության, հնարավորություն կստեղծվի, բայց դա չի նշանակում միանշանակ»,- ասաց նա՝ ընդգծելով, որ բոլորին էլ հայտնի են Ադրբեջանի և Թուրքիայի նկրտումները և ամեն դեպքում խորհուրդ տվեց հանրությանը պատրաստ լինել ամեն ինչի հանկարծակիի չգալու համար:
Հետևեք մեզ Facebook-ում