Արցախի հուշարձանների անհետացումը կնշանակի անդառնալի կորուստ մարդկության համար. «Վատիկան Նյուզ»

Սուրբ Աթոռի պաշտոնական լրատվականը՝ «Վատիկան Նյուզ»-ը նոյեմբերի 17-ին տպագրել է հոդված՝ անդրադառնալով Հայաստանի արևելյան սահմանին ադրբեջանական կողմից նոյեմբերի 14-16-ի ընթացքում իրականացված ագրեսիվ գործողություններին:

Հոդվածի «Արվեստի ու մշակույթի ժառանգություն» բաժնում նշվում է, որ նախորդ տարվա զինադադարից հետո հազարավոր տեղահանվածների ապագայի հանդեպ խորը մտահոգությանը զուգահեռ միջազգային հանրության կողմից դրսևորվում էր տարածաշրջանի հոգևոր մշակութային ժառանգության նկատմամբ մեծ ուշադրություն։

«Այն այսօր էլ համարվում է կենտրոնական խնդիր։ Լեռնային Ղարաբաղի հոգևոր ու մշակութային ժառանգության պաշտպանության հստակ ուղերձները սկիզբ առան դեռևս մեկ տարի առաջ՝ Եկեղեցիների համաշխարհային խորհրդի գլխավոր քարտուղար պատվելի Իոան Սաուկայի՝ ՅՈՒՆԵՍԿՕ-ի գլխավոր տնօրեն Օդրի Ազուլեին հասցեագրված նամակով, որում նշվում է, որ վերջերս Ադրբեջանի վերահսկողության տակ անցած շրջաններում պատմամշակութային ժառանգության հանդեպ մեր մտահոգությունները մեծապես ավելացան հոկտեմբերին Շուշիի Ղազանչեցոց տաճարի կրկնակի ռմբակոծման, ու հատկապես, (աղոթատեղիների) սրբապղծման դեպքերի մասին վերջին շրջանում ստացված բազմաթիվ զեկույցների արդյունքում։ Նամակում նշվում է նաև, որ իրականում խոսքը գնում է Լեռնային Ղարաբաղի/Արցախի մոտ չորս հազար պատմական, կրոնական ու մշակութային հուշարձանների մասին, որոնք այժմ Ադրբեջանի հսկողության ներքո են, ու դրանցից յուրաքանչյուրն ապագային փոխանցվելիք հզոր հոգևոր ու մշակութային ժառանգություն է համարվում և դրանց անհետացումը կնշանակի անդառնալի կորուստ մարդկության համար»,- նշվում է հոդվածում: