Զարեհ Սինանյանը Ռուսաստան կմեկնի

ՀՀ վարչապետի որոշմամբ՝ Սփյուռքի գործերի գլխավոր հանձնակատար Զարեհ Սինանյանը մի քանի օրով կգործուղվի Ռուսաստանի Դաշնություն: Այս մասին տեղեկանում ենք վարչապետի՝ e-gov.am հարթակում տեղադրված որոշումից: «Ղեկավարվելով «Կառավարության կառուցվածքի և գործունեության մասին» օրենքի 7-րդ հոդվածի 5-րդ մասով՝

1. Սփյուռքի գործերի գլխավոր հանձնակատար Զարեհ Ջոն Սինանյանին 2021 թվականի նոյեմբերի 18-26-ը ներառյալ գործուղել Ռուսաստանի Դաշնություն (նոյեմբերի 18-21-ը՝ Մոսկվա, նոյեմբերի 21-ին՝ Տվեր, նոյեմբերի 21-24-ը՝ Սանկտ-Պետերբուրգ, նոյեմբերի 24-26-ը՝ Պերմ) հայկական համայնքային կառույցների ներկայացուցիչների, գործարար շրջանակների, մշակույթի գործիչների, լրագրողների հետ հանդիպելու և հետագա համագործակցության արդյունքները և հետագա ուղիները քննարկելու նպատակով:

2. Սփյուռքի գործերի գլխավոր հանձնակատար Զարեհ Ջոն Սինանյանի՝ գործուղման ավիատոմսերի (Երևան-Մոսկվա, Սանկտ-Պետերբուրգ-Պերմ, Պերմ-Երևան), գիշերակացի և օրապահիկի հետ կապված ծախսերը, ինչպես նաև «COVID-19» ՊՇՌ նմուշառումների վճարները կատարել Հայաստանի Հանրապետության 2021 թվականի պետական բյուջեով Հայաստանի Հանրապետության վարչապետի աշխատակազմի «Հայաստան-Սփյուռք գործակցության» ծրագրի «Աշխատանք սփյուռքի համայնքներում» միջոցառման արտասահմանյան պաշտոնական գործուղումների համար նախատեսված միջոցների հաշվին: 

3. Սփյուռքի գործերի գլխավոր հանձնակատար Զարեհ Ջոն Սինանյանին՝ գործուղումից վերադառնալուց հետո եռօրյա ժամկետում Հայաստանի Հանրապետության վարչապետին ներկայացնել Ռուսաստանի Դաշնություն գործուղման արդյունքների մասին հաշվետվություն»,- նշված է որոշման մեջ: