Ներդրողների համար գլխավոր խնդիրներն են «ատկատները», «փայ մտնելը» և հարկային ճնշումները. «Ծառուկյան դաշինքը» դեմ է կառավարության ծրագրին (տեսանյութ)

ԱԺ նիստին այսօր Կառավարության ծրագրի ներկայացմանը Ծառուկյան դաշինքի պատգամավոր Նաիրա Զոհրաբյանը փորձել է պարզել` որքանով է այն հավակնոտ. «Նշված է ծրագրում` 12 կետով նվազեցնել աղքատությունը։ Իրականում աղքատությունը շատ ավելի մեծ չափերի է. կան աշխատող աղքատներ` ստանալով նվազագույն աշխատավարձ, ունեն տարրական հացի խնդիր։ Միջազգային փորձագետների գնահատականներով` մենք արձանագրել ենք ընդամենը 0,2 տոկոս տնտեսական աճ։ Սա իրատեսությո՞ւն է, թե՞ ձախողում։ Ընդհանրապես չխոսվեց պետական պարտքի մասին։ Շնորհավորում եմ` մեր պարտքը 6 մլրդ դրամի սահմանագիծը հատել է։ Պիտի արձանագրենք, որ այն խիստ ռիսկային է»։ Հաղորդում է «Ա1+»-ը:

Իր ելույթում նա նաեւ նշեց` ըստ Գելափի տվյալների` ՀՀ արտագաղթի ցուցանիշները 7 նիշով վատթարացել են՝ 2013թ. սկսած։ Ուսումնասիրությունները անցկացվել է 31 երկրներում, ՀՀ-ն 8-րդ տեղում է։ Թվարկեմ այն երկրները, որտեղից մարդիկ մազապուրծ ուզում են փախչել` Հայիթի, Ալբանիա, Նիգերիա, Կոնգո, Դոմինիկյան հանրապետություն, Հոնդուրաս, եւ 8-րդ տեղում ՀՀ-ն է։ Մենք այստեղ կուզենայինք լսել պոզիտիվ արդյունքներ, բայց ոչ ընդամենը հայտարարությունների մակարդակով»։

Տիկին Զոհրաբյանը Կառավարության ծրագրից մեջբերեց ներդրումների հատվածով մոտեցումները. «Ծրագրում նշված է` ով ՀՀ-ում ներդրում անի, կստանա ՀՀ քաղաքացիություն։ Այս մոդելը ակտիվ կիրառվում է մեծ Բրիտանիայում, Շվեյցարիայում, բայց ոչ ՀՀ-ում։ ՀՀ-ում ներդրումներ չեն լինում, քանի որ մեզ մոտ ատկատ կա, փայ մտնել կա, հարկային պրեսինգ, կոռուպցիա, այլ ոչ թե որ քաղաքացիություն չեն տալիս։ Ձեզ ժամանակին հարցրել էի` դուք կարող եք կտրել այն ճյուղը, որի վրա նստած է իշխանությունը։ Ինչպես հասկացանք` կամ ձեր ձեռքերը չեն հասնում, կամ թույլ չեն տալիս կտրել այդ ճյուղը։ Դուք ասում էիք` մենք ամեն օր գոլ ենք խփելու, սակայն մենք դեռ միայն ինքնագոլ ենք տեսել սեփական դարպասին։ Ծառուկյան դաշինքը դեմ է քվեարկելու Կառավարության ծրագրին»:

Մանրամասները՝ «Ա1+»-ի տեսանյութում