Չավուշօղլուն՝ Դոնբասի Բայրաքթարների մասին. «Ուկրաինան պետք է դադարեցնի Թուրքիայի հիշատակումը». Haber7

Թուրքիայի արտգործնախարարը ՌԴ արտգործնախարար Սերգեյ Լավրովի հետ հանդիպումից առաջ հայտարարություն է արել: Նրա դիրքորոշումը Դոնբասում թուրքական արտադրության անօդաչու թռչող սարքերի վերաբերյալ ռեզոնանսային դարձավ։ Եթե ​​ղարաբաղյան հակամարտությունում Անկարան ամեն կերպ շեշտում էր, որ հայրենական անօդաչու թռչող սարքերն օգնեցին Ադրբեջանին հաղթանակ տանել մարտի դաշտում, ապա թուրքերն այլ դիրքորոշում ընտրեցին Ուկրաինայի հարցում։

Թուրքիայի ԱԳ նախարար Մևլութ Չավուշօղլուն G20-ի առաջնորդների գագաթնաժողովի կապակցությամբ Թուրքիայի նախագահ Ռեջեփ Թայիփ Էրդողանի հետ Հռոմում գտնվելու ժամանակ հանդիպել է իր ռուս գործընկեր Սերգեյ Լավրովի հետ։ Այս մասին գրում է թուրքական Haber7-ը:

Հանդիպումից հետո Չավուշօղլուն հայտարարություններ է արել թուրքական եւ ռուսական լրատվամիջոցների համար։

Թուրքիայի արտգործնախարարը նշել է, որ Ուկրաինայի կողմից օգտագործվող գրոհային անօդաչու թռչող սարքերը (ԱԹՍ) կարող են արտադրվել Թուրքիայում, բայց դրանք օգտագործվում են Ուկրաինայի կողմից, ուստի Թուրքիային չի կարելի մեղադրել այս իրավիճակում։ «Սրա համար Թուրքիային չի կարելի մեղադրել», - հայտարարել է թուրք դիվանագետը:

Դոնբասում թուրքական արտադրության անօդաչու թռչող սարքերի օգտագործման մասին ռուս թղթակցի հարցին, Չավուշօղլուն պատասխանել է նաեւ, որ եթե ​​մի երկիր իրենցից զենք է գնում, այն դադարում է թուրքական լինել։ «Հնարավոր է, որ այն արտադրվել է Թուրքիայում, բայց այն պատկանում է Ուկրաինային։ Թուրքիային չի կարելի մեղադրել դրա համար»,- հայտարարել է թուրք դիվանագետը:

Նախարար Չավուշօղլուն ընդգծել է, որ ահաբեկչության դեմ պայքարելիս Թուրքիան ևս բախվում է տարբեր երկրների տարբեր զենքերին. «Տարբեր երկրներում ահաբեկչության դեմ մեր պայքարում մենք երբեմն հանդիպում ենք զենքերի նաև տարբեր երկրներից, այդ թվում՝ Ռուսաստանից տարբեր զինատեսակների, բայց մենք երբեք չենք մեղադրում Ռուսաստանին դրա համար։ Ուկրաինան նույնպես պետք է դադարի օգտագործել մեր երկրի անունը», - ասել է նա:

Zham.am