Ռուսաստանը «մանդարինային» պատերա՞զմ է հայտարարել Թուրքիային

Հոկտեմբերի 29-ից Ռուսաստանն արգելել է թուրքական մանդարինի ներկրումը երկիր, նման որոշում է կայացրել հայտնի Роспотребнадзор-ը։ Ռուսական իշխանությունները դա հիմնավորել են այն գործոնով, որ թուրքական մանդարինի մեջ իբր հայտնաբերվել են «Քլորպիրիֆոս» թունաքիմիկատի մնացորդային քանակություններ։

Թեև այս որոշման բացատրությունը բժշկական բնույթ է կրում, դիտորդներն այս փաստը կապում են հոկտեմբերի 27-ին ուկրաինական բանակի կողմից Դոնբասում տեղի աշխարհազորայինների դեմ թուրքական Բայրաքթար օգտագործելու հետ։

Սովորաբար Ռուսաստանը նման քայլերի է դիմում, երբ կան քաղաքական պատճառներ։ Ինչպես գիտեք, նման ամենահայտնի քայլերից մեկը 2016-ի իրադարձություններն էին, երբ ռուսական կործանիչ խոցվեց Թուրքիայի օդային տարածքում, և ի պատասխան՝ Մոսկվան արգելեց թուրքական լոլիկի ներմուծումը Ռուսաստանի Դաշնության տարածք։ Թեեւ այն ժամանակ լոլիկի ներկրման արգելքը բացատրվում էր բժշկական գործոնով, այն ժամանակ նույնիսկ ՌԴ նախագահ Վլադիմիր Պուտինը խոստովանեց, որ «այդ քայլը քաղաքական բնույթ ուներ»։

5 տարի առաջ Պուտինը նույնիսկ նշել էր, որ Մոսկվան չի սահմանափակվի խոցված ռուսական կործանիչի համար լոլիկի ներկրման արգելքով՝ անուղղակիորեն հաստատելով, որ այդ արարքը քաղաքական բնույթ է կրում։

Հոկտեմբերի 27-ին Դոնբասում Բայրաքթարի օգտագործումից հետո ռուս բարձրաստիճան պաշտոնյաները հայտարարեցին, որ Ուկրաինայի հետ զենքի առևտրի մեջ մտնելը կարող է բացասական հետևանքներ ունենալ Դոնբասում։ Դիտորդների կարծիքով՝ Մոսկվան Թուրքիային անուղղակի մեսիջ է ուղարկում, որ Անկարան նույնպես պատասխանատու է հնարավոր ռազմական բախման և Դոնբասում հակամարտության նոր հնարավոր սրման համար։

Դժվար է կանխատեսել, թե ինչպիսին կլինի Անկարայի արձագանքը։ Հիշեցնենք, որ Բայրաքտարների վաճառքի ժամանակ նշվել էր, որ թուրքերի համար «սա ընդամենը բիզնես գործարք է, ոչ ավելին», այնուամենայնիվ, Թուրքիայի հետագա քայլերը Ուկրաինայի նկատմամբ, ըստ վերլուծաբանների, հուշում էին, որ Անկարան այս ուղղությամբ ոչ թե մարտավարական, այլ ռազմավարական նպատակներ ունի։ Դիտորդների կարծիքով՝ որքան լարված լինեն ռուս-ուկրաինական հարաբերությունները, այնքան Թուրքիայի դիրքերը Սիրիայում և Հարավային Կովկասում ավելի շահեկան կլինեն։ «Այս պարզ հաշվարկի հիման վրա է Անկարան գործում»,- նշում են դիտորդները:

Արտակ Հակոբյան