«Ես ուրախ եմ, որ մարդիկ ինձ ծաղրում են, հումորներ են անում, ջղայնություն են արտահայտում, ոմանք նույնիսկ վիրավորում են»

«Նիկոլ Փաշինյանը մեր ղեկավարն է, պետության ղեկավարի լուսանկարը խորհրդանիշ է եւ այո, նաեւ լինում է, երբ աշխատանքային գործունեության ժամանակ նայում եմ լուսանկարին եւ հիշում, որ պետք է լինել ազնիվ, անաչառ եւ պահպանել այն բոլոր պահանջները, որոնք մեր առաջ դրել է վարչապետը»,- արդարադատության նախարար Կարեն Անդրեասյանի այս պատասխանը հարցին, թե ինչո՞ւ է վարչապետ Նիկոլ Փաշինյանի լուսանկարը փակցրել իր աշխատասենյակում՝ սոցցանցերում, մամուլում բազմաթիվ մեկնաբանությունների ու քննադատության տեղիք էր տվել:

Երեկ «Առավոտը» նախարար Կարեն Անդրեասյանին հարցրեց՝ արձագանքներին հետեւելով՝ փոխե՞լ եք ձեր դիրքորոշումը, որովհետեւ ձեզ հիշեցնում են, որ դուք օրենքով պիտի առաջնորդվեք, օրենքը ձեզ պիտի հիշեցնի անաչառության եւ ազնվության մասին, ոչ թե Փաշինյանի նկարը: Նա պատասխանեց.

«Ես չեմ ուզում խոսել բուն նկարի մասին, բայց եթե որեւէ լրատվամիջոց տեսնի բուն կոնտեքստում ինչպես է ինձ լրագրողը փորձում հեգնանքով ասել՝ ի՞նչ եք դուք խոսում նկարի հետ, ես փորձել եմ այդ հեգնանքին պատասխանել այն լրջությամբ, որով կարող էի: Այսինքն, երբ խորհրդանիշ ես համարում՝ լուսանկարը կլինի, դրոշը կլինի, անկախ նրանից ով իր համար աշխատանքի ոլորտում ինչն է համարում խորհրդանիշ, դու փորձում ես խորհրդանիշից ստանալ ինչ-որ մեսիջ: Պարզ է, որ եթե ինչ-որ մեկն ուզում է աշխատանքային մթնոլորտում պետական խորհրդանիշները տանել ինչ-որ անձնական բնույթի, նույնիսկ կրոնական բնույթի հարձակումների՝ ես իրենց օգնել չեմ կարող: Ես կարդացել եմ որոշ հումորներ, որոշ ծաղրանքներ: Ես ուրախ եմ, որ մարդիկ ինձ ծաղրում են, հումորներ են անում, ջղայնություն են արտահայտում, ոմանք նույնիսկ վիրավորում են: Ինչո՞ւ: Թող իրենց հոգեկան հանգստությունը, եթե իրենք հանգստանում են այդ չարությամբ, չարացածությամբ, թող ինձ վրա գա եւ նման փոքր հարցերի պարագայում:

Հուսով եմ, ես առիթ չեմ տա մեր հասարակությանը իսկապես իմ վրա բարկանալու»: Մեր դիտարկմանը՝ Չարենցի պես հնչեց՝ «թող ոչ մի զոհ չպահանջվի ինձնից բացի…»՝ Կարեն Անդրեասյանն արձագանքեց. «Այս պահին քաղաքական վիրավորանքներ ես պատրաստ եմ հանգիստ ընդունելու: Հուսով եմ մարդիկ չափը կպահպանեն եւ անձնական ու այլ տիրույթներ չեն անցնի: Դրանից իմ քաղաքական կշռի հարցը չի նույնիսկ, սա ուղղակի իրենց իսկ խղճի ու բարոյականության հարցն էր»:

Կարեն Անդրեասյանը հորդորեց Փաշինյանի նկարի մասին իր խոսքին գնահատական տալուց առաջ հարցուպատասխանն ամբողջությամբ լսել ու տեսնել, թե ինչպես է լրագրողն իրեն հարց տալիս. «Ինձ հեգնանքով հարցնում է՝ ի՞նչ եք դուք խոսում նկարի հետ, ես փորձում եմ դրան արձագանքել ուղիղ: Կարող էի անել քաղաքական գործչին հարիր՝ ուղղակի չպատասխանել կամ այլ ձեւով պատասխանել, բայց ես հարգում եմ լրագրողներին, մանավանդ՝ ինտելեկտուալներին, որոնք ուզում են ինձ հետ զրուցել»: