Լեւոն Արոնյանը՝ Norway Chess-ի հաղթող
Լեւոն Արոնյանը նվաճեց Նորվեգիայի Ստավանգեր քաղաքում ավարտված Norway Chess սուպերմրցաշարի հաղթողի կոչումը` շախմատի պատմության մեջ մասնակիցների վարկանիշով ուժեղագույն մրցաշարը: Հայտնում է NEWS.am Sport-ը:
Վերջին տուրում Լեւոն Արոնյանը սեւերով մրցեց ամերիկացի Ուեսլի Սոի հետ եւ բավարարվեց ոչ ոքի արդյունքով՝ վաստակելով 6 միավոր։ Առաջին տեղի համար հայ գրոսմայստերի միակ մրցակից, ամերիկացի Հիկարու Նակամուրան վերջին տուրում պարտվեց ամերիկացի Ֆաբիանո Կարուանային եւ մնաց երկրորդ տեղում՝ 5 միավոր։ Արոնյանը միանձնյա գրավեց առաջին տեղը։
Այս մրցաշարում Լեւոն Արոնյանը հաղթանակներ տարավ աշխարհի չեմպիոն, նորվեգացի Մագնուս Կարլսեն, աշխարհի նախկին չեմպիոն, ռուսաստանցի Վլադիմիր Կրամնիկի, աշխարհի չեմպիոնի նախկին հավակնորդ, ռուսաստանցի Սերգեյ Կարյակինի նկատմամբ, չկրեց ոչ մի պարտություն։
Նախորդ տարի Norway Chess-ում հաղթել էր աշխարհի չեմպիոն Մագնուս Կարլսենը, իսկ Լեւոն Արոնյանը գրավել էր երկրորդ տեղը:
Այս տարի մրցաշարի հաղթողի համար նախատեսված էր 70 հազար եվրո պարգեւ, երկրորդ տեղի համար՝ 40 հազար, երրորդ տեղի համար՝ 25 հազար եվրո:
Norway Chess-2017, 9-րդ տուր
Ուեսլի Սո (ԱՄՆ, 2812) - Լեւոն Արոնյան (Հայաստան, 2793)՝ 0,5։0,5
Ֆաբիանո Կարուանա (ԱՄՆ, 2808) - Հիկարու Նակամուրա (ԱՄՆ, 2785)՝ 1։0
Վիշվանաթան Անանդ (Հնդկաստան, 2786) - Մագնուս Կարլսեն (Նորվեգիա, 2832)՝ 0,5։0,5
Սերգեյ Կարյակին (Ռուսաստան, 2781) - Մաքսիմ Վաշյե-Լագրավ (Ֆրանսիա, 2796)՝ 0,5։0,5
Վլադիմիր Կրամնիկ (Ռուսաստան, 2808) - Անիշ Գիրի (Հոլանդիա, 2771)՝ 1։0
Վերջնական մրցաշարային դրությունը. Լեւոն Արոնյան՝ 6, Նակամուրա, Կրամնիկ՝ 5-ական, Կարուանա, Սո, Գիրի՝ 4,5-ական, Վաշյե-Լագրավ, Անանդ, Կարլսեն՝ 4-ական, Կարյակին՝ 3,5։
Հետևեք մեզ Facebook-ում