Կալանավորված Առուշ Առուշանյանը ջախջախիչ հաղթանակ տարավ

Գորիս խոշորացված համայնքում բոլոր 18 ընտրատեղամասերից ստացված նախնական արդյունքներով՝ Առուշ Առուշանյանը հաղթել է ՏԻՄ ընտրություններում։ Առուշ Առուշանյանի օգտին քվեարկել է 6250 ընտրող, «Քաղաքացիական պայմանագիր» կուսակցության թեկնածու Վլադիմիր Աբունցի օգտին է քվեարկել 3590 ընտրող։

Մասնակցել է ընտրողների 50,4 տոկոսը։

Հիշեցնենք, որ Առուշ Առուշանյանը «Հայաստան» դաշինքի ցուցակով մասնակցում էր խորհրդարանական ընտրություններին։ Այս պահին Առուշանյանը գտնվում է անազատության մեջ։

Նշենք, որ ՀՀ 6 մարզի 9 համայնքներում այսօր ՏԻՄ ընտրություններ էին:

Գորիսում ընտրություններին մասնակցում են քաղաքական երեք ուժեր՝ «Առուշ Առուշանյան» դաշինքը, «Քաղաքացիական պայմանագիր» կուսակցությունը և Հայ ազգային կոնգրեսը։ 

***

Նախնական տվյալներով, բոլոր բնակավայրերում Առուշ Առուշանյանը բացարձակ առաջատար է: Այս մասին NEWS.am-ի հետ զրույցում ասաց «Առուշ Առուշանյան» դաշինքի լիազոր ներկայացուցիչ Իրինա Յոլյանը:

«Նաեւ որոշակի տվյալներ ունենք Գորիս քաղաքի ընտրատեղամասերից, այնտեղ նույնպես բացարձակ առաջատար է` 50 եւ ավելի տոկոս: Ես ուզում եմ շնորհակալություն հայտնել Գորիս քաղաքի բնակիչներին իրենց վստահության համար: Անկախ քաղաքական հետապնդումներից, կեղծ քրեական գործերից, վստահեցին մեր թիմին, բոլորը տեսան մեր աշխատանքը վերջին 4 տարիներին»,-ասաց նա:

Ըստ NEWS.am-ի, Առուշ Առուշանյանի շտաբում արդեն սկսել են տոնել հաղթանակը: Այնտեղ են նաեւ «Հայաստան» դաշինքի պատգամավորներ Վահե Հակոբյանը եւ Աննա Գրիգորյանը: