Հռոմի պապ Ֆրանցիսկոսը հայտարարել է, որ ամաչում է Ֆրանսիայում մանկապիղծ քահանաների հանցագործությունների համար

Հռոմի պապ Ֆրանցիսկոսն իր խորը վիշտն է հայտնել Ֆրանսիայում եկեղեցում անչափահասների նկատմամբ սեռական բռնության միջադեպերի կապակցությամբ եւ իր սեփական ամոթի պատճառ է անվանել դա: Այդպես, չորեքշաբթի պոնտիֆիկոսը կոլեկտիվ ընդունելության ժամանակ մեկնաբանել է նախորդ օրը ներկայացված զեկույցը, ըստ որի 1950-2020 թվականներին Ֆրանսիայում կաթոլիկ եկեղեցու ներկայացուցիչների կողմից կատարված սեռական հանցագործությունների զոհ է դարձել ավելի քան 200 հազար անչափահաս, փոխանցում է ՏԱՍՍ -ը:

«Երեկ ֆրանսիացի եպիսկոպոսների համաժողովը ստացավ անկախ հանձնաժողովի զեկույցը: 1950 թվականից անչափահասների տպավորիչ թիվ է դարձել սեռական բռնության զոհ: Ես ուզում եմ իմ անկեղծ ցավն ու կարեկցանքը հայտնել բոլոր զոհերին: Սա իմ ամոթն է, մեր ամոթը, իմ ամոթը եկեղեցու չափազանց երկար անգործության համար»,- ասել է Հռոմի պապ Ֆրանցիսկոսը:

Եկեղեցում սեռական հանցագործությունների քննության անկախ հանձնաժողովի (Ciase) եռամյա զեկույցի համաձայն` 1950 թվականից կաթոլիկ հոգեւորականների կամ կրոնական առաջնորդների կողմից սեռական հանցագործությունների զոհ է դարձել 216.000 անչափահաս: Այս ցուցանիշը հասնում է 330 հազարի, եթե ավելացնել նաեւ եկեղեցու հետ կապված աշխարհականների կատարած հանցագործությունները:

2019 թվականի փետրվարին Ֆրանցիսկոսի նախաձեռնությամբ Վատիկանում երեխաների պաշտպանության հարցերով հատուկ հանդիպում տեղի ունեցավ, որի կենտրոնական թեման կաթոլիկ քահանաների մանկապղծության խնդիրներն էին: Միջոցառմանը մասնակցում էր գրեթե 200 հիերարխ` հինգ մայրցամաքների տարբեր երկրների եպիսկոպոսների 114 համաժողովների ղեկավարներ, Արեւելյան կաթոլիկ եկեղեցիների պատրիարքներ, ընտանիքի եւ երեխաների հարցերով զբաղվող կոնգրեգացիաների նախագահներ, մասնագետներ: Ձեւով եւ բովանդակությամբ այս հանդիպումը համեմատելի էր արտակարգ սինոդի հետ: