Ձեզ ավելի մեծ դավաճան ու կապիտուլյանտ են անվանում․ Փաշինյանը՝ «Հայաստանի» պատգամավորին

Ուղիղ մեկ տարի առաջ դուք որպես գերագույն գլխավոր համանատար ռուսական RBK-ին տված հարցազրույցում դուք տեղեկատվություն հայտնեցիք Ջաբրայիլյան կամ Լելե Թեփեի գործողության մասին:

Այս մասին այսօր՝ հոկտեմբերի 6-ին, ԱԺ-ում, դիմելով ՀՀ վարչապետ Նիկոլ Փաշինյանին նշեց «Հայաստան» խմբակցության պատգամավոր Արմենուհի Կյուրեղյանը: Վերջինս մեջբերում արեց այդ հարցազրույցից, որտեղ Փաշինյանն ասել է. «Եթե հաշվի առնենք այն տեղեկատվությունը, որ ստացվում է այսօր վաղ առավոտից, կարող ենք ասել, որ ղարաբաղցի զորահրամանատարների մտահղացումն իրագործվել է, նրանք հարավում մարտավարական քայլեր են ձեռնարկել, միջանցք են թողել եւ այնտեղ ծուղակի մեջ գցել ադրբեջանի ռազմական կորպուսը: բառացիորեն այս րոպեներին այդ կորպուսն ստանում է ջախջախիչ հարվածներ եւ ես կարծում եմ, որ սա յկլինի ողջ գործողության առանցքային կետը: Այս պահին, իմ տեղեկություններով, դրվում է Ղարաբաղի բանակի վերջնական հաղթանակի իրական հիմքը»:

Այնուհետեւ Կյուրեղյանը շարունակեց. Իրականում մենք այդ գործողության արդյունքում ունեցանք հարյուրավոր զոհեր, կրեցինք նյութատեխնիկական հսկայական կորուստներ, իսկ ադրբեջանականթուրքական կողմը ստացավ մեծ առավելություն:

Հիմա հարց. Ո՞վ է այս ողբերգահան հետեւանքներով ռազմական գործողության հիմնական պատասխանատուն եւ մեղավորը: Դուք որպես գերագույն գլխավոր հրամանատար, ձեզ մեղավոր ճանաչում եք, թե ոչ, թե՞ սա էլ «ես մեղավոր չեմ, ինձ սխա էլն զեկուցել» շարքից է: Ի պատասխան Նիկոլ Փաշինյանը կրկին հայտարարեց՝ պատերազմում ամեն ինչի մեղավորն էլ, պատասխանատուն էլ ինքն է: «Հարյուր անգամ եմ ասել»,- ասաց նա:

Փաշինյանը նշեց, թե ինքը եղել է Ստեփանակերտում ու հրավիրել է խորհրդակցություն, լսել է մարդկանց կարծիքները, թե ինչ կարող են անել իրադրությունը փոխելու վերաբերյալ: «Հնչել են առաջարկներ, ես էլ խնդրել եմ, հանձնարարել եմ, որպեսզի զինվորականները գնահատեն առաջարկներն ու կայացնեն որոշում:

Զինվորականները քննարկել են, կայացրել են որոշում ու ինձ զեկուցել են որոշման ընթացքի մասին»,- ասաց նա: Վարչապետն ընդգծեց, որ անընդհատ Լելե Թեփեի մասին ասում են, բայց ինքը ոչ մի անգամ այդ անունը չի տվել. «Լելե Թեփե» օպերացիա, նման հասկացություն չի եղել, այդ հետո է մտել պրոպագանդիստական նկատառումներով, թե, իբր, ես ասել եմ՝ Սերժ Սարգսյանը 2016 թվականին կորցրել է, ինձ համար դա ունի քաղաքական նշանակություն, գնացեք Լելե Թեփեն վերցրեք, որ դիվիդենտ առաջանա, դա կատարյալ անհեթեթություն է»,- ասաց նա: Արձագանքելով այն մտքին, որ ինքը պատերազմը հոկտեմբերի 7-ին չի կանգնեցրել, որպեսզի իրեն դավաճան ու կապիտուլյանտ չասեն, բայց միևնույն է՝ այդպես են դիմում, Փաշինյանը նշեց, թե ընդդիմությանն ավելի շատ դավաճան ու կապիտուլյանտ են անվանում ու ընտրությունները դրա մասին են վկայում: «Ձեր դավաճան ու կապիտուլյանտ լինելու մասին, կարծում եմ, առաջիկայում ավելի մանրամասն քննարկումներն կունենանք»,- ասաց նա:

Վարչապետը նշեց, թե հոկտեմբերի 7-ի առաջարկն ընդունվել է, պայմանավորվածությունը ձեռք է բերվել, որի արդյունքով Հայաստանի ԱԳ նախարարը Ադրբեջանի ու ՌԴ ԱԳ նախարարների հետ ստորագրել է փաստաթուղթ, որը հրապարակվել է, որը հանրության կողմից լայնորեն ողջունվել ու ընդունվել է, բայց Ադրբեջանը չի կատարել:

«Այսինքն՝ ես չեմ հասկանում, էս ամեն ինչը դուք, իրոք, չգիտե՞ք: Ձեզ թվում է, որ ձեզ համար իրականություն եք ստեղծել... Լելե Թեփե հասկացությունը ձեր մտացածին քարոզչական, կներեք արտահայտությանս, հնարքներ են, որոնց սնանկությունը ընտրություններով երևաց»,- հայտարարեց Փաշինյանը:

Այդ ընթացքում Ռուբեն Ռուբինյանը նկատողություն հայտարարեց Արմենուհի Կյուրեղյանին: