«Հայաստան» դաշինք. Փաշինյանը ցանկանում էր միայն իշխանությունը պահպանել՝ չփորձելով ինչ-որ կերպ փոխել իրավիճակը ճակատում

Իշխանությունը, որն իր ազդեցությունը տարածել է նաեւ Ղարաբաղի նախագահ Արայիկ Հարությունյանի վրա, նրանց ամբարտավանությունն ու պարծենկոտությունը հանգեցրին նրան, որ պատերազմի ժամանակ ՀՀ երկրորդ նախագահ Ռոբերտ Քոչարյանի, ինչպես նաեւ մի շարք նախկին բարձրաստիճան զինվորականների առաջարկները պարզապես անտեսվեցին:

Այս մասին NEWS.am-ի թղթակցի հետ զրույցում ասաց «Հայաստան» ընդդիմադիր դաշինքի պատգամավոր Գեղամ Մանուկյանը՝ մեկնաբանելով հանրապետության նախկին նախագահ Ռոբերտ Քոչարյանի վերջին հայտարարությունները: Ըստ քաղաքական գործչի՝ իշխանությունը վախենում է ընդդիմության դերի ուժեղացումից, ուստի Հայաստանի վարչապետ Նիկոլ Փաշինյանն ամեն կերպ խուսափում է իր քաղաքական ընդդիմախոսների հետ հանդիպումից: «44-օրյա պատերազմի ընթացքում Արայիկ Հարությունյանը երբեք չի թողնվել բախտի քմահաճույքին:

Նա երբեք միայնակ չի եղել: Հայաստանից բարձրաստիճան պաշտոնյաները միշտ հետեւել են նրան, նույնիսկ հետագա հրաժարականներից հետո: Խոսքը, մասնավորապես, Արգիշտի Քյարամյանի մասին է (Հայաստանի քննչական կոմիտեի ներկայիս ղեկավար - խմբ.), ով ստվերի պես հետեւում էր Հարությունյանին: Այնպես որ, այդ ամբողջ ընթացքում Արայիկ Հարությունյանը երբեք ինքնուրույն չի գործել»,- ասաց Մանուկյանը:

Նա համոզված է, որ Փաշինյանը ցանկանում էր միայն իշխանությունը պահպանել՝ չփորձելով ինչ-որ կերպ փոխել իրավիճակը ռազմաճակատում: Արդյունքում, ինչպես կարծում է պատգամավորը, վարչապետն անընդհատ ստիպված է որոշ զիջումներ անել Բաքվին եւ Անկարային՝ դրանով իսկ դավաճանելով Հայաստանի շահերին: