Սաակաշվիլին Վրաստանու՞մ է թե ոչ. Այս հարցում վրացական քաղաքական դասը բաժանվել է 2 մասի. Տեսանյութ

Վրաստանի նախկին նախագահ Միխեիլ Սաակաշվիլին, ով արդեն 8 տարի է ինչ լքել էր երկիրը և բնակվում էր Ուկրաինայում, վաղուց հայտարարել է, որ հոկտեմբերի 2-ին կայանալիք ՏԻՄ ընտրություններին հայրենիք է վերադառնալու: Վրաստանի իշխանություններն, իրենց հերթին, հայտարարել էին, երբ Սաակաշվիլին մտնի Վրաստան, նրան անմիջապես կձերբակալեն: Իսկ երեկ՝ սեպտեմբերի 30-ին, Սաակաշվիլին իր ֆեյսբուքյան էջով ավետել է, որ արդեն Վրաստանում է:

«Բարի լույս Վրաստան, ութ տարի անց արդեն Վրաստանից», – գրել է Սաակաշվիլին :

Վրաստանի նախկին նախագահը հայտարարել է նաեւ, որ իբր գտնվում է Բաթումում և շուտով վերադառնալու է Թբիլիսի: Ավելին, Սաակաշվիլիի կողմնակիցները նշում են, որ հոկտեմբերի 3-ին Թբիլիսիի Ազատության հրապարակում տեղի կունենա հանրահավաք, որին կմասնակցի նաեւ Վրաստանի նախկին նախագահը: Իշխանությունները հերքում են այն տեղեկատվությունը, որ Սաակաշվիլին երկրում է՝ նշելով, որ Սաակաշվիլիի հրապարակած տեսանյութը պարզապես ֆեյք է, և նրա ետևի ֆոնին ոչ թե Բաթումի քաղաքի շենքենր են, այլ մեկ այլ քաղաք, և այդ պատճառով անիմաստ է ձերբակալել մի մարդու, ով ավելի շատ ֆանտոմ է, քան իրականություն:

Վրաստանի ընդդիմությունը հակառակն է պնդում: Ընդդիմությանը ոգևորում է Սաակաշվիլիի վերադարձը Վրաստան և ասվում է, որ եթե հոկտեմբերի 2-ի ընտրությունները կրկին կեղծվեն, ապա Վրաստանում կսկսվի Իվանիշվիլիի թիմի կառավարության խաղաղ տապալման գործընթացը:

Ըստ չեզոք վերլուծաբանների, այն, որ Սաակաշվիլին Վրաստանում է, ավելի մոտ է իրականությանը, քան տեղեկատվական ֆեյքի, քանի որ նրանց կարծիքով, եթե Սաակաշվիլին այս անգամ էլ խաբի, ապա նա վերջնականապես կդառնա ծաղրածու վրաց հասարակության աչքում և կդառնա «քաղաքական դիակ» նույնիսկ Ուկրաինայում: Այսինքն, ըստ չեզոք վերլուծաբանների, նույնիսկ Սաակաշվիլին չի կարող իրեն թույլ տալ նման հրեշավոր խաբեություն:

Այնուամենայնիվ, այստեղ երկրորդ հարցն է ծագում. եթե Սաակաշվիլին գտնվում է Վրաստանում, ապա ինչպե՞ս է նա կարողացել առանց միջադեպի հատել սահմանը: Ավելին, Վրաստանի նախկին նախագահը նախապես հայտարարել էր իր մտադրությունների մասին, և իշխանությունները գիտեին դրանց մասին և սպասում էին Սահակաշվիլիի գործողություններին, հատկապես այն տարբերակը, ըստ որի նա կարող էր հայրենիք վերադառնալ ուկրաինական նավով, քիչ հավանական է համարվում, քանի որ ինչ-ինչ, բայց Ուկրաինայի տարածքից եկող նավերը պետք է ավելի լուրջ վերահսկողության ենթարկվեին վրացական իշխանությունների կողմից:

Վրացական ընդդիմադիր շրջանակները փորձում են առաջ տանել իրադարձությունների այս տարբերակը` ակնարկելով, որ երկրում գործող իշխանությունը նույնիսկ ի վիճակի չէ վերահսկել Վրաստանի ծովային սահմանները:

Եթե ​​Սաակաշվիլին գտնվում է Վրաստանում, ուրեմն մնում է քննարկել մեկ այլ տարբերակ, ըստ որի` երկրի նախկին նախագահը կարող էր մուտք գործել Վրաստան Թուրքիայի տարածքով: Բայց սա արդեն բոլորովին այլ խոսակցության թեմա է, և եթե այս տարբերակը հաստատվի, ապա դրանից կարող է բխել նոր, շատ հեռահար նպատակներ ունեցոծ աշխարհաքաղաքական ծրագրի մեկնարկի մասին եզրակացություն:

Սա՛ է իրականությունը:

Արտակ Հակոբյան