Չավուշօղլուն կրկին «սառը ջուր լցրեց» Փաշինյանի իշխանության վրա
Մինչ Հայաստանի իշխանություններն անընդհատ փորձում են «դրական ազդակներ ուղարկել Թուրքիային»՝ ակնարկելով, որ պատրաստ են վերականգնել հայ-թուրքական հարաբերությունները՝ դրանք տարանջատելով հայ-ադրբեջանական հարաբերություններից, թուրքերը մշտապես խստացնում են Հայաստանի հետ հարաբերությունների վերականգնման նախապայմանները:
Եթե նախկինում թուրքերը պատրաստ էին բացել հայ-թուրքական սահմանը` Ղարաբաղի ազատագրված 1-2 շրջաններից զորքերի դուրսբերման դիմաց, ապա այսօր, զգալով Հայաստանի թուլությունը, Անկարան ավելի ու ավելի շատ նախապայմաններ է դնում Հայաստանի դեմ:
Ընդամենը օրեր առաջ Թուրքիայի նախագահ Էրդողանը հայտարարել էր, որ հայ-թուրքական հարաբերությունները բարելավելու համար Հայաստանը պետք է տարածաշրջանում բացի այսպես կոչված «Զանգեզուրի միջանցքը», այսօր Չավուշօղլուն Հայաստանի համար դրեց նոր նախապայման:
Նա փաստացի հայտարարել է, որ Թուրքիան կկարգավորի իր հարաբերությունները Հայաստանի հետ միայն այն բանից հետո, երբ Հայաստանը կկատարի պաշտոնական Բաքվի բոլոր պահանջները: Գործնականում դա նշանակում է հետևյալը. Թուրքիայի քաղաքականությունը նույն Ադրբեջանի քաղաքականությունն է, իսկ Ադրբեջանի դիրքորոշումը կապիտուլյացիոն նոր համաձայնագիր է, որի դիմաց Հայաստանը պետք է պաշտոնապես ճանաչի Ղարաբաղը որպես Ադրբեջանի մաս: Այլ կերպ ասած, տեղի կունենա այն, ինչ մենք վաղուց էինք կանխատեսել. Թուրքական խաղաղասիրական հռետորաբանությունը պարզապես «քող» է Հայաստանի դեմ հիբրիդային պատերազմի շարունակության համար:
Իսկ ո՞րն է ելքը այս ամբողջ իրավիճակից: Սա արդեն մեկ այլ խնդիր է, որը ոչ մի կապ չունի ոչ հայ-ադրբեջանական, ոչ հայ-թուրքական հարաբերությունների հետ:
Սա՛ է իրականությունը:
Արտակ Հակոբյան
Հետևեք մեզ Facebook-ում