ՀՀ էկոնոմիկայի նախարարությունը՝ Գորիս-Կապան ճանապարհին ադրբեջանական անցակետի մասին

ՀՀ էկոնոմիկայի նախարարությունը գտնում է, որ տնտեսական խնդիր չունենք, չնայած այն հանգամանքին, որ ադրբեջանական կողմը անցակետ է տեղադրել Գորիս-Կապան միջպետական ճանապարհին, փաստաթղթեր և որոշ դեպքերում անգամ գումար է պահանջում իրանական բեռնատարներից։

«Փաստինֆո»-ն դիմել էր ՀՀ էկոնոմիկայի նախարարություն՝ խնդրելով անդրադառնալ այս հարցին, սակայն նախարարությունից մեզ ասացին, որ այդ հարցերն իրենց լիազորությունների ներքո չեն և հորդորեցին դիմել ԱԳՆ, ՊՆ կամ ԱԱԾ։

«Տնտեսական մասով դեռ խնդիր չունենք, որ այդ հատվածով մենք անդրադառնանք»,-նշեցին նախարարությունից։

Հարցին՝ եթե անգամ այս պահին խնդիր չեն տեսնում, ի՞նչ քայլեր են իրականացնում, որ հետագայում խնդիրներ չառաջանան, Էկոնոմիկայի նախարարությունից ասացին, որ ԱԳՆ-ի, ՊՆ-ի և ԱԱԾ-ի իրենց գործընկերները պետք է ինչ-որ բաներ անեն, որի արդյունքում տնտեսական խնդիրներ չենք ունենա։

«Դրա համար այս պահին նրանց դաշտում է, նրանք պետք է այդ հարցերով զբաղվեն։ Այդ ընթացքում մենք կհսկենք, որ խնդիրներ չառաջանան»,-հայտնեցին նախարարությունից։