ԱԺ հանձնաժողովի գործառույթներում մեկ բառ չունենալ Արցախի հարցի վերաբերյալ՝ անոմալիա է. Աղվան Վարդանյան

«Պատիվ ունեմ» և «Հայաստան» խմբակցություններն առաջարկել էին ձևավորել Արցախի հարցերով մշտական հանձնաժողով, որը մերժվեց: Այս մասին ԱԺ պետաիրավական հարցերի մշտական հանձնաժողովի նիստին ասաց «Հայաստան» խմբակցության պատգամավոր Աղվան Վարդանյանը՝ կրկին առաջարկելով ստեղծել Արցախի հարցերով մշտական հանձնաժողով:

«ԱԺ 12 հանձնաժողովների գործառույթների մեջ որևէ բառ չկա Արցախի Հանրապետության մասին: Առաջարկներ եղան, թե պետք չէ հանձնաժողով ստեղծել, կարելի է արտաքին հարցերի հանձնաժողովը վերանվանել արտաքին հարաբերությունների և Արցախի հարցերի հանձնաժողով: Ես կարծում եմ, որ հատկապես այս փուլում, երբ ընթանում են տարբեր գործընթացներ Արցախի, Հայաստանի շուրջ, մենք՝ իբրև խորհրդարանական երկիր, պետք է կարողանանք մեր մշտական հանձնաժողովներում Արցախին առնչվող հարցերը ներառել»,-ասաց Վարդանյանը՝ նշելով, թե հանձնաժողովի ստեղծումը կնշանակի հարաբերությունների նոր մակարդակի բարձրացում:

«Բոլոր նախորդ կառավարությունների գործունեության մեջ Արցախի հարցն առանձնահատուկ կարևորված է եղել, առանձնահատուկ ուղղություն է եղել, և մեր արտաքին քաղաքականության 70-80 տոկոսն առնչվել է Արցախի խնդրի կարգավորմանը: Լինել խորհրդարանական երկիր, արտաքին քաղականության մեջ ունենալ այսպիսի վիթխարի՝ դեռևս չլուծված հարց, օրակարգ, և ԱԺ հանձնաժողովի գործառույթներում մեկ բառ իսկ չունենալ այդ վիթխարի հարցի վերաբերյալ ուղղակի անոմալիա է: Դա թուլության, վախի, ինքնիշխանության պակասի ազդակ կլինի արտաքին աշխարհին»,-ասաց Աղվան Վարդանյանը: Հաղորդում է Tert.am-ը։ 

ԱԺ «Քաղաքացիական պայմանագիր» խմբակցության պատգամավոր, պետաիրավական հարցերի մշտական հանձնաժողովի նախագահ Վլադիմիր Վարդանյանն արձագանքեց՝ ՀՀ կառավարության ծրագրում կան Արցախի Հանրապետության անվտանգության երաշխավորման, կարգավիճակի հստակեցման և այլնին վերաբերող հարցեր:

«Եթե մենք ուզում ենք իրոք զբաղվել այս հարցով, ուզում ենք օգտակար լինել Արցախի ժողովրդի ինքնորոշման իրավունքի հաստատմանը, եթե դուք՝ որպես ընդդիմություն, ուզում եք առավել ակտիվ պահել Կառավարությանն այս հարցի շրջանակում, ընտրել եք սխալ գործիքակազմ: Այս նախագիծն ուղղված չէ դեպի ապագա, ուղղված չէ Արցախում այսօր ու վաղը առնչվող խնդիրներին, առավելապես վերաբերում է անցյալին»,-ասաց իշխանական պատգամավորը՝ հավելելով, թե այդ նախագիծը որևէ ձևով չի մոտեցնում Արցախի հարցի հայանպաստ լուծումներին:

«Այն չի էլ վատթարացնում իրավիճակը, որևէ բան չի փոխում։ Ձեր նախագիծը, բացի ներպետական սպառումից, որևիցե հարց չի կարգավորում»,-ասաց Վարդանյանը։