ՄԱԿ-ն Աֆղանստանից տարհանել է եւս 120 աշխատակցի եւ այլոց
ՄԱԿ-ը կիրակի իրականացրել է իր 120 աշխատակիցների եւ հասարակական կազմակերպությունների ներկայացուցիչների տարհանումն Աֆղանստանից Ղազախստան: Այս մասին ասվում է ՄԱԿ-ի գլխավոր քարտուղարի պաշտոնական ներկայացուցիչ Ստեֆան Դյուժարիկի տարածած հաղորդագրության մեջ, փոխանցում է ՏԱՍՍ -ը:
«Օգոստոսի 22-ին ՄԱԿ-ն Աֆղանստանում Քաբուլից Ալմաթի է դուրս բերել 120 մարդու, սա երկրորդ նման թռիչքն է վերջին մեկ շաբաթվա ընթացքում: Ուղեւորների թվում են ՄԱԿ-ի աշխատակիցները եւ մի քանի հասարակական կազմակերպությունների անդամներ, որոնք ՄԱԿ-ի գործընկերներն են Աֆղանստանում»,- ասված է հաղորդագրության մեջ:
ՄԱԿ-ը կենտրոնացած է «մեր հազարավոր աշխատակիցների եւ գործընկերների անվտանգության» ապահովման վրա եւ աշխատում է «կարեւոր հումանիտար եւ այլ օգնություն հասցնել կարիքավոր միլիոնավոր աֆղանցիներին»,- ասել է Դյուժարիկը:
Անցյալ շաբաթ ՄԱԿ-ի մոտ հարյուր աշխատակից Քաբուլից մեկնել է Ալմաթի` հեռավար ռեժիմով աշխատանքը շարունակելու համար: Մինչ արմատական «Թալիբան» շարժման վճռական հարձակումը, Աֆղանստանում ՄԱԿ-ի տարբեր առաքելություններում կար մոտ 3000 տեղացի բնակիչ եւ ավելի քան 700 օտարերկրացի:
Հետևեք մեզ Facebook-ում