Ստանձնում ենք տարածաշրջանի համար խաղաղ զարգացման դարաշրջան բացելու մեր պատասխանատվությունը. Փաշինյան. Տեսանյութ

Փաշինյանն այսօր՝ օգոստոսի 18-ի, Կառավարության հերթական նիստին ներկայացրեց Կառավարության 2021-2026 թվականների գործունեության ծրագիրը։

Նա ասաց, որ ծրագիրը բաղկացած է 6 բաժիններից. այդ բաժիններ են՝ անվտանգություն եւ արտաքին քաղաքականություն, տնտեսություն, ենթակառուցվածքների զարգացում, մարդկային կապիտալի զարգացում, իրավունք եւ արդարադատություն, ինստիտուցիոնալ զարգացում։

Նիկոլ Փաշինյանն ասաց, որ նախագծի հիմնական քաղաքական ուղերձը ծրագրի նախաբանում է և նա ընթերցեց այդ հատվածը։  Նիկոլ Փաշինյանն ասաց, որ բարեփոխված զինված ուժերը պետք է լինեն մեր անվտանգության ապահովման հիմնական գործոնը և կարևորեց ակտիվ արտաքին քաղաքականությունը որպես անվտանգության ապահովման հաջորդ գործոն։

«Ընդգծում ենք, որ ՀՀ–ն պետք է վարի ակտիվ և նախաձեռնողական արտաքին քաղաքականություն»,–ասաց նա։

Նիկոլ Փաշինյանը ներկայացրեց նաև կառավարության ծրագրում հայ–ռուսական ռազմավարական դաշինքին, ՀԱՊԿ–ին, Մինսկի խմբի աշխատանքներին վերաբերող շեշտադրումները։

«Մենք տարածաշրջանի խաղաղության և կայունության համար էական ենք համարում թշնամության մթնոլորտի կառավարումը և հաղթահարումը։ Տարածաշրջանի կայունությունը և խաղաղությունը արձանագրում ենք որպես մեր երկարատև ռազմավարություն»,–ասաց նա։

Փաշինյանը նշեց նաև, որ Հայաստանի եւ տարածաշրջանի համար խաղաղ զարգացման դարաշրջան բացելը այնուամենայնիվ արտահերթ ընտրությունների արդյունքներով ժողովրդի առաջ կառավարության ստանձնած մեծագույն առաքելությունն է. «Կառավարությունը գիտակցում է, որ այս խնդրի լուծումը միայն Հայաստանի Հանրապետությունից չի կախված, այլեւ տարածաշրջանի մյուս երկրների կեցվածքից եւ ցանկությունից։ ՀՀ կառավարությունը ստանձնում է տարածաշրջանի համար խաղաղ զարգացման դարաշրջան բացելու իր բաժին անելիքը եւ պատասխանատվությունը»։

Նիկել Փաշինյանն ասաց, որ իրենց ծրագիրը և պլանն այն է, որ առաջիկայում սահմանապահ ծառայության պատասխանատվության տարածքները կընդլայնվեն և այս առումով սահմանապահ զորքերը պետք է ընդլայնվեն, վերափոխվեն, բարեփոխվեն։

Zham.am