Արմեն Գևորգյանի պաշտպանը միջնորդեց՝ Գևորգյանի անձեռնմխելիության հարցով դիմել ՍԴ

ՀՀ նախկին փոխվարչապետ, ՀՀ ԱԺ «Հայաստան» խմբակցության պատգամավոր Արմեն Գևորգյանի պաշտպան Էրիկ Ալեքսանյանն այսօրվա միջնորդություն ներկայացրեց դատարանին՝ պահանջելով դիմել ՍԴ՝ Արմեն Գևորգյանի անձեռնմխելիության հաղթահարման վերաբերյալ օրենսդրական բացի հարցով։

Ալեքսանյանն ընդգծեց, որ պատգամավորի նկատմամբ քրեական հետապնդում կարող է հարուցվել բացառապես ԱԺ թույլտվությամբ։ Սահմանադրությամբ պատգամավորը երաշխավորված է ինչպես գործառութային, այնպես էլ՝ անձնական անձեռնմխելիությամբ, սակայն առկա չէ կարգավորում՝ հին կամ նոր քրեական հետապնդման վերաբերյալ, օգտագործվում է հետապնդում երևույթը, այլ ոչ թե՝ նոր կամ հին հետապնդում։

Ալեքսանյանը հիշեցրեց նախագահող դատավոր Աննա Դանիբեկյանի՝ նախորդ դատական նիստերի ընթացքում արված հայտարարությունը, որով դատարանը տեսնում էր քրեական հետապնդում իրականացնելու հետ կապված խնդիր և գտնում է, որ անհրաժեշտ է հաղթահարել անձի անձեռնմխելիությունը։ Այլ խոսքով՝ պաշտպանության կողմը խնդիր է տեսնում Արմեն Գևորգյանի նկատմամբ քրեական հետապնդման շարունակականության վերաբերյալ։

Պաշտպան Հովհաննես Խուդոյանն էլ ընդգծեց, որ քրեական գործի վարույթը կասեցնելու անհրաժեշտություն կա։ Պաշտպան Հայկ Ալումյանը նշեց, որ դատարանը դիմում է ՍԴ, եթե կասկածներ ունի՝ նորմի սահմանադրականության հարցի վերաբերյալ։ Նրա խոսքով՝ այսօրվա դատական նիստում տպավորություն է, թե դատարանի կողմից կան որոշակի վերապահումներ՝ կապված անձեռնմխելիության հաղթահարման հետ, հետևաբար, դատարանը պետք է դիմի ՍԴ և կասեցնի գործի վարույթը։
Պաշտպանը գտնում է, որ եթե մի օր պարզվի, որ Արմեն Գևորգյանն ունի անձեռնմխելիություն և այդ պայմաններում դատավճիռ կայացվի, ապա այն կլինի հակասահմանադրական։

Մեղադրող դատախազ Պետրոս Պետրոսյանն առարկեց միջնորդությանը՝ պնդելով, որ քրեական հետապնդման հարուցումը բացահայտված է Քրեական դատավարության օրենսգրքով։ Նրա խոսքով՝ քրեական հետապնդման տակ գտնվող անձի՝ պատգամավորի կարգավիճակ ստանալուց հետո նրա անձեռնմխելիության հաղթահարման անհրաժեշտություն չկա։ Մեղադրողը նշեց, որ միջնորդությունը վերաբերում է սահմանադրական նորմի մեկնաբանմանը, որն արդեն իսկ իրականացվում է, ՍԴ դիմելու անհրաժեշտություն չկա, միջնորդությունը ենթակա է մերժման։

Դատարանը հետաձգեց միջնորդության քննությունը՝ մինչև «Հայաստան» խմբակցության կողմից ՍԴ դիմում ներկայացնելը՝ պարզելու, թե ինչ դիմում է ներկայացվում։

Հիշեցնենք, որ նշված դրվագով Ռոբերտ Քոչարյանը մեղադրվում է առանձնապես խոշոր չափերով կաշառք ստանալու, իսկ Արմեն Գևորգյանը՝ առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Աղբյուր` Փաստինֆո