Պեսկովն արձագանքել է հայ-ադրբեջանական սահմանին ռուս սահմանապահներ տեղակայելու Փաշինյանի առաջարկին

Կրեմլում տեղյակ են հայ-ադրբեջանական սահմանին լարվածության մասին։ Այս մասին ասել է Ռուսաստանի նախագահի մամուլի քարտուղար Դմիտրի Պեսկովը, հաղորդում է ՌԻԱ Նովոստին։

«Մենք գիտենք, որ երեկ հայ-ադրբեջանական սահմանին լարվածություն է եղել։ Եվ դուք գիտեք, որ Ռուսաստանի ներկայացուցիչները մեծ ջանքեր են գործադրել, որպեսզի հրադադարի ռեժիմը վերականգնվի։ Աշխատանքը շարունակվում է»,- ասել է Պեսկովը՝ պատասխանելով լրագրողների հարցին:

«Ռուսաստանը շարունակում է իր շփումները Երևանի և Բաքվի հետ, որպեսզի լիարժեք ապահովի եռակողմ պայմանավորվածությունների իրականացումը»,- նշել է ՌԴ նախագահի մամուլի քարտուղարը։

Փաշինյանի առաջարկը կատարելու պատրաստակամության վերաբերյալ ճշտող հարցին ի պատասխան Պեսկովն ասել է․ «Երևանի հետ շփումները շարունակվում են»։

Հիշեցնենք, որ հուլիսի 29-ի կառավարության նիստի մեկնարկին վարչապետի պաշտոնակատար Նիկոլ Փաշինյանն առաջարկել էր դիտարկել հայ-ադրբեջանական սահմանի ողջ երկայնքով ռուս սահմանապահների հենակետերի տեղակայումը՝ սահմանազատման ու սահմանագծման աշխատանքները ռազմական բախումներից զերծ պահելու նպատակով։

Հիշեցնենք, որ հուլիսի 28-ին, ժամը 03։40-ի սահմաններում, ադրբեջանական ԶՈւ ստորաբաժանումները հարձակում էին ձեռնարկել հայ-ադրբեջանական սահմանի հյուսիսարևելյան ուղղությամբ տեղակայված հայկական դիրքերի ուղղությամբ։ Ծավալվել էին տեղային մարտեր:

Ադրբեջանական հարձակման հետևանքով հայկական կողմն երեք զոհ, չորս վիրավոր է ունեցել։

Zham.am