Դերասանները դժգոհ մնացին ԿԳՄՍ նախարարի հետ հանդիպումից. Տեսանյութ

ԿԳՄՍ նախարարի հետ հանդիպումը մեզ չի կարող գոհացնել, որովհետեւ մենք համաձայն չենք նախարարության կողմից առաջարկվող լուծման հետ: Այս մասին նախարար Վահրամ Դումանյանի հետ հանդիպումից հետո լրագրողների հետ զրույցում նշեց Պետական կամերային երաժշտական թատրոնի գլխավոր ռեժիսոր Սամսոն Ստեփանյանը:

«Նախարարությունը այս որոշումը համարում է շատ նորմալ, իրատեսական, թատրոնների միավորումը համարում են շատ առողջարար: Նախարարությունը վստահ է, որ կառավարությունը կհաստատի այդ որոշումը»,- ասաց Սամսոն Ստեփանյանը:

Նա ասաց, որ նախարարին են ներկայացրել իրենց պահանջը, այն է՝ որ Կամերայինը չմիավորեն Պարոնյանի անվան թատրոնի հետ․ «Երկրորդ, քաղաքում կան բազմաթիվ ազատ տարածքներ, որոնք կարող են համապատասխանել Սիմֆոնիկ նվագախմբի պահանջներին: Երրորդ, ցանկալի չի ոլորտների խնդիրները խառնել իրար: Չորրորդ, մեր թատրոնի շենքը, լինելով սիմֆոնիկ նվագախմբի տրամադրության տակ, կարիք կունենա կառուցվածքային փոփոխությունների, այսինքն ներդրումների: Եվ հաջորդը, փակել մի թատրոն, որ սիմֆոնիկի համար ստեղծեն փորձատեղի, իմ տրամաբանության մեջ չի տեղավորվում: Այս ամենը ասվեց նախարարին: Իրենց կողմից էլ եղան տրամաբանական փաստարկներ, թե մենք գտնվում ենք այնպիսի ծայրահեղ վիճակում, որ ոլորտի մասնագետների հետ երկար քննարկումների արդյունքում եկել են եզրակացության, որ այս երկու թատրոնները ունեն եզրեր միավորվելու»,-ասաց նա՝ հավելելով, որ իրենք չեն համակարպվելու այդ որոշման հետ:

Հիշեցնենք, որ նախարարությունը մտադիր է Պետական կամերային երաժշտական թատրոնը միացնել Պարոնյանի անվան երաժշտական կոմեդիայի պետական թատրոնին, իսկ Կամերային թատրոնի շենքը տրամադրել Սիմֆոնիկ նվագախմբին՝ փորձերի համար: