Թե ինչ է տեղի ունեցել Զաքարյանին բռնությամբ բերման ենթարկելու պրոցեսի ժամանակ, դրան կանդրադառնանք. Սարգսյան

«Հրապարակը» գրում է. «Գրել էինք, որ Մեղրի համայնքի նախկին ղեկավար, «Հայաստան» դաշինքի ընտրական ցուցակի 17-րդ համար Մխիթար Զաքարյանը ձերբակալվել է: Նրա պաշտպան Երեմ Սարգսյանը հայտնել էր, որ ձերբակալումն արդեն բողոքարկվել է դատարան, դեռևս որևէ դատավորի չի մակագրվել։

Զաքարյանին մեղադրանք է առաջադրվել Քրեական օրենսգրքի 308 րդ հոդվածի 2-րդ մասով (պաշտոնեական լիազորությունները չարաշահելը) և 314-րդ հոդվածի 1-ին մասով (պաշտոնեական կեղծիքը):

Կենտրոնական ընտրական հանձնաժողովը որոշել է բավարարել Մեղրի համայնքի նախկին ղեկավար, «Հայաստան» դաշինքի ընտրական ցուցակի 17-րդ համար Մխիթար Զաքարյանի նկատմամբ քրեական հետապնդում հարուցելու և կալանավորումը որպես խափանման միջոց ընտրելու համաձայնություն տալու մասին դատախազության միջնորդությունը:

Քիչ առաջ ՔԿ շենքի դիմաց, լրագրողների հարցին, թե ինչու են Զաքարյանին բերման ենթարկել, գործողությունը ինչպես է հիմնավորվել , արդյոք բերման ենթարկելը հիմնավորել են նրանով, թե տանը մարդ չի եղել, Երեմ Սարգսյանը ասաց. «Իբր փորձել մի քանի անգամ ծանուցագիր ներկայացնել, իբր տանը մարդ չի եղել, չեն կարողացել ներկայացնել։ Նման կերպ բերման ենթարկելը ակնհայտ է , որ սրանք այլ նպատակներ են հետապնդում։ Մենք Զաքարյանի վնասվածքներին դեռ կանդրադառնանք, բայց ես կարող եմ ասել , որ ինքը թևի հատվածում վնասվածքներ ուներ դեռ պատերազմին մասնակցության ժամանակ, իսկ թե ինչ է տեղի ունեցել այս բռնության գործադրման արդյուքնում, կրկնում եմ, դրան դեռ կանդրադառնանք։ Իմանալով, որ մարդը վնասվածքներ ունի, հրազենային վիրավորում ստացած անձ է ու նման կերպ մարդուն բերման են ենթարկում, դա արդեն վկայում է, որ բոլոր նորմերը անցել են։ Եթե իրավապահները փորձում են հանցագործություններով, ապօրինություններով իբր օրինականություն հաստատել, սա մոլորվածություն է, նման բան չի կարող լինել։ Կալանքի հետ կապված այս պահին դեռ տեղեկություններ չունենք»,- ասաց Սարգսյանը՝ մտնելով ՔԿ շենք։ 

Ավելի վաղ Երեմ Սարգսյանը հայտնել էր, որ այսօր ժամը 14։00-ից սկսած ՔԿ-ում գործողություններ են լինելու Զաքարյանի գործի վերաբերյալ»։