201-րդ ռազմակայանը վերազինվել է Աֆղանստանի հետ սահմանին օգնություն ցուցաբերելու համար. ՌԴ ԱԳՆ

Ռուսական ռազմակայանը Տաջիկստանում վերազինվել է անհրաժեշտ ամեն ինչով՝ հանրապետությանն օգնություն ցուցաբերելու համար Աֆղանստանի հետ սահմանին իրավիճակը կարգավորելու հարցում, բայց եթե ՌԴ-ից պահանջվեն լրացուցիչ ջանքեր, դրաք կձեռնարկվեն։ Այս մասին երեքշաբթի լրագրողներին ասել է Ռուսաստանի փոխարտգործնախարար Անդրեյ Ռուդենկոն՝ պատասխանելով ՏԱՍՍ-ի հարցին։

«Ամեն ինչ կախված կլինի նրանից, թե ինչպես կզարգանա իրավիճակը Հյուսիսային Աֆղանստանում։ Մենք այնպես ենք հասկանում, որ այնտեղ բավական լարված իրավիճակ է, քանի որ, ըստ որոշ տվյալների, սահմանի 70 տոկոսը վերահսկվում է «Թալիբան» շարժման կողմից։ Մեզ մոտ, ինչպես գիտեք, Տաջիկստանում տեղակայված է 201-րդ ռազմակայանը, որպեսզի աջակցություն ցուցաբերի հանրապետությանն անհրաժեշտության դեպքում»,- ասել է նա։

«Եթե լրացուցիչ ջանքեր պահանջվեն, ապա դրանք կձեռնարկվեն»,- ավելացրել է ՌԴ ԱԳ փոխնախարարը։

Ռուդենկոն ասել է, որ Մոսկվան եւ Դուշանբեն աշխատանքային շփումներ են պահպանում պաշտպանական գերատեսչությունների եւ սահմանապահ ծառայությունների գծով, իրավիճակը տաջիկ-աֆղանական սահմանին պահվում է կողմերի տեսադաշտում։

«Մենք (տաջիկական կողմի հետ) շփումները շարունակում ենք աշխատանքային մակարդակով՝ զինվորականների, սահմանապահների գծով։ Իրավիճակը գտնվում է մեր ուշադրության դաշտում»,- ասել է նա։

Ռուդենկոն նշել է, որ շատ բան կախված կլինի այն բանից, թե ինչպես կզարգանան իրադարձությունները Հյուսիսային Աֆղանստանում։ «Մենք հասկանում ենք, որ այնտեղ բավական լարված իրադրություն է, քանի որ, ըստ որոշ տվյալների՝ Տաջիկստանի հետ սահմանի 70 տոկոսը վերահսկվում է «Թալիբան» շարժման կողմից»,- ավելացրել է նա։

Հուլիսի 5-ին Տաջիկստանի ազգային անվտանգության պետկոմիտեի սահմանապահ զորքերի մամուլի կենտրոնը տեղեկացրել էր երկրի տարածք սահմանամերձ տեղամասերով Աֆղանստանի կառավարական զորքերի 1037 զինծառայողի անցման մասին, որոնք ստիպված էին նահանջել թալիբների հետ զինված բախումների ընթացքում։ Վերջին երկու շաբաթում տեղի է ունեցել արդեն մի քանի նման դեպք։ Մամուլի կենտրոնում նշել են, որ ելնելով բարիդրացիության եւ Աֆղանստանի ներքին գործերին չմիջամտելու սկզբունքից՝ աֆղանստանցի զինվորականներին թույլատրել են անցնել տաջիկական տարածք։

Աղբյուր՝ NEWS.am