Թուրք-ադրբեջանական ցնծություն. Թուրքական երջանկության մեխանիկան՝ Նիկոլի հաղթանակի համար

Նախօրեին, երբ դեռ ընտրությունները նոր էին մեկնարկում՝ Թուրքիայի արտգործնախարարը հույս հայտնեց, թե՝ «այսօրվա ընտրությունների արդյունքում Հայաստանում ձևավորվելիք նոր իշխանությունը չի կրկնի նախորդի սխալները»։

«Հույս ունենք՝ Հայաստանը կհասկանա, որ տարածաշրջանում կայունության ու խաղաղության ապահովման միակ միջոցը բարիդրացիական հարաբերություններն են իր հարևան երկրների հետ, Հայաստանը պետք է դադարի տարածքային պահանջներ ներկայացնել հարևաններին և սկսի նորմալ հարաբերություններ կառուցել նրանց հետ»,- հայտարարել էր Մևլութ Չավուշօղլուն, հավելելով՝ պատերազմից հետո, որի արդյունքում Ադրբեջանն ազատեց իր հողերը, թե՛ Բաքուն, թե՛ Անկարան վճռականորեն պատրաստ են քայլեր ձեռնարկել տարածաշրջանում խաղաղության ու կայունության համար։
Թուրքիայի արտգործնախարարը նաև նշել էր, թե երկկողմ հարաբերությունների հաստատումը հնարավորություն կընձեռի բազմաթիվ տարածաշրջանային ծրագրերի իրականացման համար։

Նախընտրական քարոզչության ընթացքում բազմիցս գրվեց ու ասվեց, որ սա Հայաստանի, թերևս ամենակարևոր ու վճռորոշ ընտրություններն են: Կապիտուլյանտ իշխանության վերընտրությունը նշանակելու է նոր խայտառակություն, նոր ստորացում, նոր զիջումներ Հայաստանից՝ թուրք-ադրբեջանական դաշինքին:

Երեկ ընտրություններ էին ընթանում, նոր էին սկսել առանձին ընտրատարածքներից ընտրության քվեարկության արդյունքներ տարածվել, իսկ «հարևան» Ադրբեջանից արդեն սոցցանցերում հաղթարշավ էր, «տոնում» էին Փաշինյանի հաղթանակը, «ցնծում» էին, բացականչում էին, շնորհավորում միմյանց...

Սա կարող է դիտարկվել որպես ադրբեջանցիների կողմից դիտավորյալ ներհայաստանյան գործընթացների վրա հոգեբանական ներգործություն ունենալու մասին: Սակայն, իրականում խնդիրն իրականում բավական խորքային է, տարածաշրջանային է:

Էրդողանն ու Ալիևն անթաքույց և սրտատրոփ սպասում էին Փաշինյանի հաղթանակին, որպեսզի իրագործեն իրենց նպատակները՝ տարածարջանային առումով: Թուրքիան Ադրբեջանում ռազմաբազա է հիմնելու, իսկ դրա համար հարկավոր է Հայաստանում այնպիսի իշխանություն, որը Ռուսաստանի հետ ունի լարված հարաբերություններ: Սա, իր հերթին Ռուսաստանի ազդեցությունն է փոքրացնում:

Այսինքն, Փաշինյանի հաղթանակը՝ աշխարհաքաղաքական առումով համընկնում է թուրք-ադրբեջանական դաշինքի ծրագրին՝ Հայաստանին պահելու այդ դաշտում:
Ահա, թե ինչու են երեկվանից ադրբեջանական սոցցանցերում, լրատվական կայքերում «հաղթական» տրամադրությունները ի ցույց դրվում:

Hayeli.am