Մեր պապերը էրգիր ասելով մնացին, հիմա էլ մե՞նք

Նախօրեին 124 մտավորականներ հանդես եկան «Հայաստան» դաշինքին սատարելու կոչով։ Նրանց մեջ է նաեւ ՀՀ վաստակավոր արտիստ, երգիչ Ներսիկ Իսպիրյանը, ով  Hraparak.am-ի հետ զրույցում նշեց, որ մեծ հույսեր է կապում «Հայաստան» դաշինքի հետ, դրա համար էլ միացել է կոչին․ 

«Իմ հույսը Ռոբերտ Քոչարյանն է, որ եթե Արցախի հարցերը չլուծի, գոնե եղածն էլ չի տա։ Թե չէ այս վիճակում չենք իմանում ինչ կլինի ու ինչ կգա մեր գլխին․․․, թուրքն արդեն եկել մտել է Շուռնուխ, Վարդենիս, Սյունիք, մենք ի՞նչ երաշխիք ունենք, որ հետագայում մեր գլխին ինչ կգա։ Մենք պապենական մշեցիներ ենք, 1916-17թթ-ին մեր պապերը գաղթեցին Մուշից ու մինչեւ վերջ իրենց աչքը մնաց իրենց երկրի ճանապարհին՝ էրգիր, էրգիր ասելով մնացին, հիմա էլ մեն՞ք։ Այսօր մենք ունենք ազատագրված, բայց ոչ ամրագրված Արցախ, որը 27 տարի պահելուց հետո, մեր ունեցածը մեր ձեռքից գնաց։ Հիմա այնպես պիտի անենք, որ մեր ունեցածը չկորցնենք,- ասում է երաժիշտն ու հորդորում բոլորին գնալ ընտրության,- պետք է բոլորը գնան ընտրության եւ իրենց խղճի մտոք ընտրեն իրենց հայրենասեր թեկնածուին՝ նրան, ում հավատում են։