«Հայաստան» դաշինքից բացատրում են, թե ինչու Ռ․ Քոչարյանը չմասնակցեց բանավեճին
Երեկ տեղի ունեցավ նախընտրական վերջին բանավեճը, որին մասնակցում էր նաև Նիկոլ Փաշինյանը, սակայն բանավեճին չէին եկել նախկին նախագահներ Լևոն Տեր-Պետրոսյանը, երկրորդ նախագահ Ռոբերտ Քոչարյանը, ոչ էլ «Պատիվ ունեմ» դաշինքից Արթուր Վանեցյանը եւ ԲՀԿ առաջնորդ Գագիկ Ծառուկյանը։ «Հայաստան» դաշինքի շտաբից մենք փորձեցինք ճշտել, թե ինչու, այնուամենայնիվ, Ռոբերտ Քոչարյանը չգնաց բանավեճի՝ չէ՞ որ ողջ հանրապետությունը հետեւում էր, եւ դա քարոզչություն անելու լավ հնարավորություն էր։
Դաշինքի շտաբի անդամներից մեկը պատասխանելու փոխարեն մի առակ հիշեց վագրի և էշի մասին եւ խնդրեց՝ որպես դաշինքի տեսակետ, ներկայացնել մեր ընթերցողին․
«Մի անգամ էշն ու վագրը բանավիճում են, թե ինչ գույնի է խոտը։ Էշն ասում է, որ խոտը կապույտ է, վագրն ասում է՝ կանաչ է։ Երկար վիճելուց հետո վագրն առաջարկում է, որ գնան առյուծի մոտ, թող վերջինս, որպես կենդանիների արքա, վճռի, թե իրենցից ով է ճիշտ։ Գնում են առյուծի մոտ, վագրն ասում է, որ էշի պնդմամբ՝ խոտը կապույտ է, իսկ իր պնդմամբ՝ կանաչ, ով է մեզնից ճիշտ։
Առյուծը պատասխանում է, որ էշը ճիշտ է, և վագրին, որպես պատիժ, 5 ամիս զրկում է ձայնի իրավունքից։ Երբ էշն իրենից գոհ-գոհ գնում է, վագրը հարցնում է առյուծին, թե՝ «հերիք չէ, որ էշին ճիշտ հանեց, դեռ մի բան էլ ինձ պատժեցիր, առյուծը պատասխանում է՝ «Ես քեզ չպատժեցի այն բանի համար, որ էշը ճիշտ էր, այլ այն բանի համար, որ էշի հետ բանավեճի մեջ ես մտել»։
Հետևեք մեզ Facebook-ում