Եթե այդ հողերը հանձնվեն, դա կլինի ինքնասպանության նման մի բան. դեսպան

25 տարվա մեջ առաջին անգամ ԵԱՀԿ Մինսկի խմբի համանախագահները բաց տեքստով ասացին, որ Ադրբեջանն է առաջինը խախտել զինադադարի ռեժիմը` հրթիռային գնդակոծում իրականացնելով. ՀՀ արտակարգ եւ լիազոր դեսպան Արման Նավասարդյանը սա կապում է մեկ այլ փաստի հետ. «Դիվանագիտության մեջ կա նեղանալու ֆենոմենը: Նրանք նեղացան, որ Ադրբեջանի ձեռքով փակվեց ԵԱՀԿ երևանյան գրասենյակը: Իսկ դրա պատասխանը որևէ ձևով պետք է տրվեր և տրվեց»: Հաղորդում է «Ա1+»-ը:

Ըստ Արման Նավասարդյանի՝ կարեւոր է նաեւ ՌԴ ԱԳ նախարարության հայտարարությունը, քանի որ Ռուսաստանը գնաց այդ քայլին, որովհետև Ադրբեջանին ուզում է հասկացնել, որ կարմիր գծի սահմաններ կան. «Եթե պատերազմ սկսվի, Ռուսաստանն իրեն պետք է մեղավոր զգա, քանի որ հսկայաքանակ զենք է մատակարարում Ադրբեջանին, եւ կստացվի, որ դա կլինի պատճառը պատերազմական գործողությունների վերսկսման: Ճիշտ է հիմա մեր զինվորները զոհվում են, միշտ այդ կրակոցները լինում են, բայց ես չեմ կարծում, որ լայնամասշտաբ գործողություններ կսկսվեն: Կողմերը պետք է գան համաձայնության»,- ասաց նա ու հղում արեց Սերժ Սարգսյանին. «Բացարձակ չի կարող զիջումների մասին խոսք լինել, փոխզիջում կարող է լինել, բայց նայած ինչի դիմաց: Եթե այդ հողերը հանձնվեն, դա կլինի ինքնասպանության նման մի բան»:

ՀՀ արտակարգ և լիազոր դեսպանը անդրադարձավ նաեւ ԱԺ-ում Սերժ Սարգսյանի ելույթին: Արման Նավասարդյանը նշեց, որ ելույթում նոր էլեմենտներ կային, որը չի կարող մեր ուշադրությունից վրիպել. «Խոսվեց ստատուս քվոյի մասին: Ասվեց, որ կարող է այն փոխվել , առաջընթաց լինի Արցախի հիմնահարցի կարգավորման մեջ. Փոխզիջում՝ այո, զիջում՝ ոչ: Սա Մամեդյարովի պատասխանն էր` խաղաղություն տարածքների դիմաց, ինչը բլեֆ է»:

Արման Նավասարդյանն անդրադարձավ նաև ԱՄՆ-Թուրքիա հարաբերություններին. «ԱՄՆ-ն բոլորովին նոր ծրագրերով է մտնում Մերձավոր Արևելք: ԱՄՆ-ն վերականգնում է կորցրածը, որն ունեցավ վերջին տարիներին: Սաուդյան Արաբիան դառնում է ԱՄՆ-ի տեղապահը տարածաշրջանում՝ երկրորդ պլան մղելով Թուրքիային: Սա կարող է բերել սունիզմի և շիիզմի բախմանը, այն իր սուր ծայրով կարող է մղվել Իրան և Սիրիա: Քանի որ նշված երկրները հանդիսանում են Ռուսաստանի դաշնակիցները, ապա կարող ենք եզրակացնել, որ Պուտինի եւ Թրամփի առաջիկա հանդիպումը բարենպաստ չի կարող լինել: Նրանք կարող են բարիկադների հակառակ կողմերում հայտնվել»:

Աղբյուր՝ «Ա1+»