Քոչարյանի համակիրը լինելուց բացի, ես հարգում եմ իրեն․ Ալիկ Սարգսյան

«Հրապարակ» թերթը գրում է. «Նախկին ոստիկանապետ Ալիկ Սարգսյանը չնայած ընդգրկված չէ որևէ ուժի ընտրացուցակում, սակայն աշխատում է Ռոբերտ Քոչարյանի ղեկավարած «Հայաստան» դաշինքի համար․ մամուլում թյուրիմացաբար լուր էր հայտնվել, թե նա հեռացել է Հայաստանից։ Արտաշատում մի քանի օր առաջ Քոչարյանի և իր համակիրների հանդիպմանն էլ նա ներկա է գտնվել։ Ի դեպ, հանդիպումը կայացել է Ալիկ Սերգեյիչի եղբայրներին պատկանող «Նոր Արտաշատ» ռեստորանում։ «Այո, ես էլ եմ մասնակցել, ես դիմավորեցի, իմ մոտ է եղել, իմ նախագահն է, տասը տարի աշխատել եմ, համակիրը լինելուց բացի, ես հարգում եմ իրեն»,-երեկ ասաց նա՝ շեշտելով, որ պաշտոնի հավակնություններ չունի։ «Բայց իմ խղճի մտոք․․․ ես տեսնում եմ, որ երկիրը լավ տեղ չի գնում, ու պետք է ինչ-որ ձևով միջամտել»։

Անդրադառնալով լրատվամիջոցներում հայտնված տեղեկություններին, թե ինքը լքել է Հայաստանը, Սարգսյանն ասաց, որ 3-4 օրով մեկնել է Մոսկվա ու վերադարձել․ «Գնացել էի հետազոտվելու, սրտիս հետ կապված ժամկետն էր, փառք աստծո, նոր ստենտավորման կարիք չառաջացավ, վերադարձա Հայաստան»։ Այլ հարցերի նա չցանկացավ պատասխանել։

Հիշեցնենք, որ Ալիկ Սարգսյանը Մարտի 1-ի գործով մեղադրվում է միանգամից 3 հոդվածով՝ պաշտոնեական լիազորությունները չարաշահելու, պաշտոնեական կեղծիք կատարելու և հանցագործությունը պարտակելու համար: Նախկին ոստիկանապետի նկատմամբ խափանման միջոց է ընտրվել չհեռանալու մասին ստորագրությունը: Սարգսյանն իրեն առաջադրված մեղադրանքը չի ընդունում, երկրից բացակայել է ՀՔԾ քննիչի թույլտվությամբ»։

Մանրամասները՝ թերթի այսօրվա համարում