Քոչարյանն իր գրքի պաստառի հարցով դատի է տվել ԿԸՀ-ին

Հայաստանի 2-րդ նախագահ, «Հայաստան» դաշինքի առաջին համար Ռոբերտ Քոչարյանը դատի է տվել Կենտրոնական ընտրական հանձնաժողովին: 

Տեղեկանում ենք դատական «Դատալեքս» տեղեկատվական համակարգից։

Քոչարյանը դիմել է Վարչական դատարան՝ պահանջելով անվավեր ճանաչել ԿԸՀ-ի՝ մայիսի 31-ին ընդունված թիվ 108-Ա որոշումը։

«Կենտրոնական ընտրական հանձնաժողովը սեփական նախաձեռնությամբ իրականացված վարչական վարույթի շրջանակներում կատարած շրջայցերի և Երևանի քաղաքապետարանի աշխատակազմից ստացված փաստաթղթերի ուսումնասիրությամբ պարզել է, որ առկա էն մի շարք գովազդային վահանակներ, որոնց վրա տեղադրված են 5 քառակուսի մետրը գերազանցող Ռոբերտ Քոչարյանի հեղինակած «Կյանք եւ ազատություն» գրքի պատկերով եւ «Հայաստանը կառուցելիս» գրառումը պարունակող պաստառներ», - նշված է ԿԸՀ այս որոշման մեջ։

Նկատի ունենալով այն հանգամանքը, որ Քոչարյանը «Հայաստան» դաշինքի ընտական ցուցակով գրանցված է որպես Ազգային ժողովի 2021 թվականի հունիսի 20-ի արտահերթ ընտրությունների պատգամավորի թեկնածու՝ ԿԸՀ-ն գտել է, որ «նրա հեղինակած գրքի պատկերով պաստառներն իրենց բովանդակությամբ ասոցացվում են նախընտրական քարոզչության հետ»։

2-րդ նախագահը հայցը ներկայացրել է հունիսի 1-ին․ այն մակագրվել է Վարչական դատարանի դատավոր Լիանա Հակոբյանին:

Հանձնաժողովը, հիմք ընդունելով Ընտրական օրենսգրքի 21-րդ հոդվածի (Նախընտրական քարոզչության ժամանակահատվածում քարոզչական պաստառի, քարոզչական տպագիր և այլ նյութերի օգտագործման կարգը) 9-րդ մասը, 51-րդ հոդվածի (Կենտրոնական ընտրական հանձնաժողովի գործառույթները և լիազորությունները) 2-րդ մասի 13-րդ կետին, որոշում է կայացրել «Քոչարյանի «Կյանք և ազատություն» գրքի պատկերը և «Հայաստանը կառուցելիս» գրառումը պարունակող պաստառները ճանաչել «Հայաստան» դաշինքի նախընտրական քարոզչության հետ ասոցացվող»։

«Նախընտրական քարոզչության անցկացման ժամանակահատվածում վերացման են ենթակա նաև կենտրոնական կամ տարածքային ընտրական հանձնաժողովի կողմից նախընտրական քարոզչության հետ ասոցացվող ճանաչված՝ 5 քառակուսի մետրը գերազանցող մակերեսով պաստառները, տպագիր և այլ նյութերը այն համայնքներում, որտեղ անցկացվում են ընտրություններ, և որոնց մասնակցում են այդ թեկնածուները, կուսակցությունները: Մինչև 5 քառակուսի մետր մակերեսով՝ նախընտրական քարոզչության հետ ասոցացվող ճանաչված պաստառները, տպագիր և այլ նյութերը, ինչպես նաև տեղական ինքնակառավարման մարմինների ընտրությունների ժամանակ 5 քառակուսի մետրը գերազանցող՝ նախընտրական քարոզչության հետ ասոցացվող համարված պաստառները, տպագիր և այլ նյութերը ենթակա են վերացման, եթե նշված պաստառների, տպագիր և այլ նյութերի ծախսերը սահմանված կարգով չեն ներառվում նախընտրական հիմնադրամում», - սահմանում է ԸՕ 21-րդ հոդվածի 9-րդ մասը: