Ո՞վ է զեկուցել Հովսեփ Խուրշուդյանին Պուտինի ծրագրերի մասին

Հովսեփ Խուրշուդյանը Facebook-ի իր էջում գրել է հետևյալը. «Տեղեկություններ ունեմ, որ Կրեմլում ԽԻՍՏ մտահոգ են Հայաստանի իշխանությունների հրապարակած մտադրություններից՝ դիմել ՄԱԿ Անվտանգության խորհուրդ, ապաև՝ հրավիրել տարածաշրջան ԵԱՀԿ դիտորդներին՝ հայ-ադրբեջանական սահմանի որոշ հատվածներում տեղակայվելու նպատակով։ Կրեմլից սկսել են ճնշում գործադրել Նիկոլ Փաշինյանի վրա՝ փոխարենը, սակայն, հրաժարվելով ապահովել, որպեսզի Ադրբեջանը վերադարձնի հայ գերիներին և դուրս գա Հայաստանի տարածքից»։

Փաստորեն, ստացվում է, որ Կրեմլի ծրագրերի, մասնավորապես Պուտինի ծրագրերի մասին Հովսեփ Խուրշուդյանին հատուկ զեկույցներ են ուղարկվում, որն ընդհամենը «Ազատ քաղաքացի» քաղաքացիական նախաձեռնության աջակցման կենտրոնի ղեկավարն է: Փաստորեն, Խուրշուդյանը, ունենալով Ռուսաստանից այս գաղտնի տեղեկատվությունը, խորհուրդ է տալիս Փաշինյանին վճռականորեն ընդդիմանալ Ռուսաստանին «ձեռի հետ էլ» քննադատում է Փաշինյանի ընդդիմախոսներին:

Դժվար թե Հայաստանում գտնվեն մարդիկ, ովքեր հավատում են, որ Խուրշուդյանը «գաղտնի գործակալներ» ունի Կրեմլում, սակայն այն, որ նրան դաժանորեն օգտագործում են Փաշինյանի շրջապատում, ավելի քան ակնհայտ է: Մնում է պատասխանել միայն մեկ հարցի. Խուրշուդյանը քննադատո՞ւմ է Կրեմլին քանի որ կատարում է Փաշինյանի շրջապատի պատվերը, թե նա ինչպես Գիքորը ասում այն, ինչ մտածում են Փաշինյանի շրջապատում, բայց չեն ուզում այդ մասին հրապարակավ խոսել:

Այս հարցում հավանականությունը 50/50 է: Իսկ եթե հաշվի առնենք այն փաստը, որ այդպիսի «Գիքորների» թիվն ամեն օր աճում է, և եթե հաշվի առնենք այն փաստը, որ իր վերջին առաջարկով Փաշինյանը փաստացի շանտաժի ենթարկեց Մոսկվային, ապա մենք կարող ենք ենթադրել, որ ներկայիս շրջանում իշխանությունները խուճապի են մատնվել, հատկապես հաշվի առնելով առաջիկա ընտրությունների գործոնը:

Սա՛ է իրականությունը։

Արտակ Հակոբյան