Սերժ Սարգսյանը 2018 թվականից հետո պատրաստվում է դեռ երկար կառավարել Հայաստանը

ՀՀ Ազգային ժողովի 6-րդ գումարման  առաջին նիստին Սերժ Սարգսյանի ծավալուն ելույթը, իսկապես, տպավորիչ բնույթ ուներ: Նա անդրադարձավ երկրի զարգացման գրեթե բոլոր խնդիրներին սկսած նոր կառավարման համակարգին անցնելուց, տնտեսական խնդիրներից և նույնիսկ չշրջանցեց ղարաբաղյան խնդիրը՝ ներկայացնելով այս խնդրի լուծման իր պատկերացումները: Տպավորիչ էր նաև այն, որ Սերժ Սարգսյանը խոսեց նաև դեմոգրաֆիկ հարցերի մասին, ընդ որում հանդես գալով ոչ միայն իր գալիք 4-5 տարվա երկրի զարգացման պատկերացումներով, այլև փորձեց ներկայացնել իր ողջ հայեցակարգը երկրի զարգացման գալիք ավելի քան 20 տարվա կտրվածքով: Նշելով, որ երկրի ՀՆԱ-ն գալիք 20 տարվա ընթացքում պետք է ավելանա 5-6 անգամ: Սակայն շատերը նկատեցին, որ նրա ծրագրային ելույթը ավելի ընդհանուր բնույթ ուներ և թվային համեմատություններն էլ նույնպես լղոզված էին: 

Այսպես նա նշեց, որ երկրի ՀՆԱ-ն 1992-2015 թթ. ավելացել է ավելի քան 4 անգամ, սակայն կանխամտածված անտեսեց մի կարևոր փաստ: Բանն այն է, որ իրոք ՀՆԱ-ն 1992-2008 թթ. ավելացել էր ավելի քան 4 անգամ, սակայն 2008-2017 թթ. այս ցուցանիշը գրեթե չի փոխվել, մինչդեռ 2008-2017 թթ. երկիրը կառավարել է հենց ինքը՝ Սերժ Սարգսյանը: Այդ իմաստով գործող նախագահի թվաբանական տրամաբանությունն ունի բավականին լուրջ թերություն:

Ըստ էության, հասկանալի է, թե ինչ էր ուզում ասել իր խոսքում գործող նախագահը, նա փաստացի ջախջախել է իր բոլոր քաղաքական հակառակորդներին, սակայն իր կառավարման ժամանակ երկրի ձեռքբերումները խիստ համեստ են, և այս հակասական իրավիճակը նա փորձում է լուծել լղոզված թվաբանական տրամաբանությամբ: Սակայն այս ամենի գլխավոր հարցն այդ տրամաբանությունը չէ, այլ այն, որ Սերժ Սարգսյանն իր ելույթով առաջին անգամ «մեսիջ» ուղարկեց քաղաքական վերնախավին և հանրությանը, որ 2018 թ. հետո ոչ միայն չի պատրաստվում թողնել ակտիվ քաղաքականությունն, այլ ճիշտ հակառակը՝ շարունակելու է ակտիվորեն ներկայացնել Հայաստանը որպես գլխավոր դեմք, և նա ունի մեծ ամբիցիոզ ծրագրեր, որոնք չեն սահմանափակվում 4-5 տարվա հեռանկարով:

Հակոբ Կարապետյան