«Ելք»-ի նպատակը ԱԺ-ն վերջնականապես կրկես դարձնելն է

Այն, որ երեկ Ազգային ժողովի նախագահ դարձավ ՀՀԿ ներկայացուցիչ Արա Բաբլոյանը քաղաքական տեսանկյունից ոչ մի զարմանալի բան չկար: Զարմանալի չէր նաև այն, որ փոխնախագահներից մեկը պետք է դառնար ԲՀԿ-ի ներկայացուցիչը: Սակայն զարմանալի էր, որ այս պարագայում Ազգային ժողովի՝ որպես «այլընտրանքային» թեկնածու, առաջարկեց «Ելք»-ը: Ցանկացած նորմալ մարդու համար պարզ էր, որ Էդմոն Մարուքյանը Ազգային ժողովի նախագահ դառնալ չէր կարող: Հարց՝ այս դեպքում ինչու իրեն միակ ընդդիմադիր   հռչակած ուժը գնած նման խեղկատակության:

Կարծում ենք, որ այստեղ ամեն ինչ ակնհայտ է: Քաղաքակիրթ աշխարհին չափազանց անհրաժեշտ է, որ ՀՀ բոլոր քաղաքական գործընթացներն արտաքուստ նմանվեն դեմոկրատականի: Պատկերացնում եք, եթե ԱԺ-ում բոլոր պաշտոնները նշանակվեին ԽՍՀՄ-ի Կոմկուսի «լավագույն» ավանդույթներով: Ըստ էության, ամեն ինչ հենց այդպես էլ եղավ, սակայն գոնե արտաքին աշխարհի համար չափազանց կարևոր էր, որ այս գործընթացները չնմանվեին հին ավանդույթներին: Հենց դրա համար էլ այդ «դեմոկրատական շղարշի» ապահովման  կարևոր առաքելությունը դրված է «Ելք» դաշինքի վրա: Կարևորը, որ արևմտյան լրահոսում արձանագրվի, որ ՀՀ Ազգային ժողովի նախագահի ընտրությունն ընթացել է դեմոկրատական սկզբունքով, որտեղ եղել է մեկից ավելի թեկնածու:

Սա է «Ելք» դաշինքի գլխավոր առաքելությունը քաղաքական համակարգում, իսկ դրանից բխող մնացած ամեն ինչը ածանցյալ դեր է կատարում: Նիկոլ Փաշինյանի և Էդմոն Մարուքյանի շոուները, քաղաքական աղմուկը անհրաժեշտ են դեմոկրատական ֆոնն ապահովելու համար: Այս ամենը արդեն ավելի ու ավելի տեսանելի է դառնալու հասարակության լայն զանգվածների համար: Հաշվի առնելով այն, որ այդ նույն հայ հասարակությունը շատ նմանատիպ օրինակներ է տեսել իր վերջին քաղաքական պատմության ընթացքում, ապա կարելի է ասել որ այս հերթական քաղաքական ներկայացումը նույնպես երկար կյանք չի ունենա:

Դավիթ Մկրտչյան