Առաջին «բախումները» Ազգային ժողովի 6-րդ գումարման առաջին նիստում

Ինչպես արդեն տեղեկացրել ենք, այսօր մեկնարկեց ՀՀ Ազգային ժողովի 6-րդ գումարման առաջին նստաշրջանը, որին ելույթ ունեցան Սերժ Սարգսյանը և Ն.Ս.Օ.Տ.Տ. Գարեգին Բ-ն:

Հիշեցնենք նաև, որ ըստ ՀՀ Ազգային ժողովի կանոնակարգ օրենքի, առաջին նիստը վարում է պատգամավորներից ամենատարիքովը: Տվյալ պահին դա  ՀՀԿ-ից պատգամավոր դարձած քրդական համայնքի ներկայացուցիչ Կնյազ Հասանովն է: Խորհրդարանական կառավարման ձևին անցնելուց հետո նորընտիր խորհրդարան է անցել 105 պատգամավոր, մինչդեռ կիսանախագահական կառավարման ձևի ժամանակ պատգամավորների թիվը 131 էր:

Նորընտիր խորհրդարանի առաջին իսկ նիստին «բախում» գրանցվեց խորհրդարանի իշխանական՝ ՀՀԿ և ընդդիմադիր՝ «Ելք» կուսակցությունների դաշինքի միջև: «Կռվախնձորը»՝ ՀՀ Ազգային ժողովի Հաշվիչ հանձնախմբում տեղերի բաշխման կարգն էր:

«Խմբակցությունների ներկայացուցիչների համատեղ քննարկման արդյունքում Հաշվիչ հանձնախմբի ստեղծման կարգի վերաբերյալ Ազգային ժողով որոշման նախագիծ է ներկայացվել, ըստ որի հանձնախումբը կազմված է 9 անդամից. տեղերը բաշխվել են խմբակցություններում ընդգրկված պատգամավորների թվի համամասնությամբ (5 անդամ ՀՀԿ, «Ծառուկյան դաշինք»՝ 2, «Ելք» և ՀՅԴ մեկական. - խմբ.)», - հայտարարեց նիստը վարով Կնյազ Հասանովը, ինչն էլ առաջացրեց «Ելք»-ի անդամների դժգոհությունը: 

«Մեր խմբակցութունը նման քննարկման չի մսնակցել, և մենք համաձայն չենք Հաշվիչ հանձնաժողովի այդ բաշխման հետ: Առաջարկում ենք, որ յուրաքանչյուր խմբակցությունից հավասար՝ 2-ական ներկայացուցիչ լինի», - ասաց Նիկոլ Փաշինյանը:

Էդուարդ Շարմազանովը ի պատասխան Նիկոլ Փաշինյանին դիմեց Կնյազ Հասանովին հորդորելով քվեարկության դնել սկզբում նշված առաջարկը՝ համամասնությամբ, չընդունվելու դեպքում՝ երկրորդ՝ հավասար բաշխելու առաջարկը:

Վահրամ Բաղդասարյանն էլ իր հերթին նշեց, որ երեկ այդ թեմայով նրանք հեռախոսազրույց են ունեցել Նիկոլ Փաշինյանի հետ և եկել այն եզրակացության, որ համամասնությամբ կձևավորվի Հաշվիչ հանձնախումբը: 

«Ելք» դաշինքից Արտակ Զեյնալյանն էլ առաջարկեց քննարկել երկու կողմերի առաջարկները. «Առաջարկում ենք քննարկել, ներկայացնել հիմնավորումներ...»:

Դրանից հետո Կնյազ Հասանովը քվեարկության դրեց ՀՀԿ-ի առաջարկը՝ համամասնությամբ:

Քվեարկության արդյունքում 51 «կողմ» և 8 «դեմ» ձայների հարաբերակցությամբ ընդունվեց ՀՀԿ-ի առաջարկը:

Քվեարկության դրված «Ելք»-ի առաջարկը չընդունվեց:

Այնուհետև խմբակցություններն անցան Հաշվիչ հանձնախմբի անդամների թեկնածությունների առաջադրմանը: 

Հիշեցնենք նաև, որ երեկ ՀՀԿ մամուլի խոսնակ Էդուարդ Շարմազանովը հայտարարեց, որ ՀՀԿ-ն առաջարկելու է ՀՀ Ազգային ժողովի 12 մշտական հանձնաժողովների թիվը կրճատել՝ հասցնելով 9-ի:

Նշենք նաև, որ այսօրվա նիստի օրակարգում ընդգրկված է 6 հարց՝ 1. Հաշվիչ հանձնախմբի ստեղծում, 2. Ազգային ժողովի նախագահի ընտրություն, 3. Ազգային ժողովի նախագահի երեք տեղակալների ընտրություններ, 4. Մշտական հանձնաժողովների ստեղծում, 5. Մշտական հանձնաժողովների նախագահների ընտրություններ, 6. Կառավարության ծրագրին հավանություն տալու հարց:

Zham.am