Ինչու՞ Սերժ Սարգսյանի ընտրությունը կանգնեց Արա Բաբլոյանի վրա
Մենք երեկ կանխատեսել էինք, որ Ազգային ժողովի նախագահ կդառնա Էդուարդ Շարմազանովը, մինչդեռ այսօր պարզ դարձավ, որ Շարմազանովը պահպանելու է Ազգային ժողովի նախագահի տեղակալի պաշտոնը, իսկ խորհրդարանի նախագահ է դառնալու Արա Բաբլոյանը:
Նշենք, որ ինքը՝ Բաբլոյանը, նույնպես չգիտեր, որ դառնալու է Ազգային ժողովի նախագահ և լրագրողներին խոստովանեց, որ մի քանի օր առաջ է իմացել դրա մասին, իսկ եթե հաշվի առնենք այն, որ Բաբլոյանը քաղաքական ֆիգուր չէ, և ՀՀԿ-ի սերնդափոխության «խորհրդանիշ» չէ, ապա կարող ենք հաստատակամորեն պնդել, որ Բաբլոյանի նշանակումը ժամանակավոր բնույթ է կրելու:
Հավանաբար, Սերժ Սարգսյանն իր այս որոշումով փորձում է տեղ թողնել մեկ տարի հետո այս պաշտոնը կրկին սակարկման առարկա դարձնելու համար: Հասկանալի է, որ դե ֆակտո Ազգային ժողովը ղեկավարելու է Շարմազանովը, և բոլորն են հասկանալու, որ ինքն է լինելու հարցերի որոշողը, և իրեն են իջեցվելու Բաղրամյան 26-ի շրջաբերականները: Եւ այդ իմաստով, Սերժ Սարգսյանի որոշումը հուշում է այն մասին, որ նա դեռ վստահ չէ, որ մեկ տարի անց փոփոխությունները լինելու են իր ցանկալի սցենարով:
Հակոբ Կարապետյան
Հետևեք մեզ Facebook-ում