Փաշինյանը, ըստ էության, բազմաթիվ խոստումներ է տվել Ալիևին և դրանք կատարելու համար պատրաստ է ամեն ինչի․ Թագուհի Թովմասյան

Կյանքը ցույց տվեց, որ հանրության թիկունքում եղան բավականին տհաճ և ազգակործան գործընթացներ։ Այս մասին այսօր լրագրողների հետ զրույցում Ազգային ժողովում ասաց ԱԺ պատգամավոր Թագուհի Թովմասյանը՝ նկատելով, որ նախկինում Նիկոլ Փաշինյանն այլ բան էր ասում, փոխանցում է Tert.am-ը:

«Ես, կարծեք թե, այդ փաստաթղթին եմ ծանոթացել, հուսամ, որ դա է ստորագրվելու, որտեղ մատնանշված է, որ, իմ տեղեկություններով, մինչև մայիսի 30 պետք է ձևավորվեն եռակողմ՝ Հայաստան, Ադրբեջան, Ռուսաստան պայմանավորվածությամբ աշխատանքային խմբեր, որոնք պետք է իրականացնեն սահմանազատման աշխատանքներ»,–ասաց նա։

Չնայած դրան, նա նշեց, որ «շան գլուխը» թաքնված է նրանում, թե ինչ սահմաններ են գծվելու և թե ինչ նախապայման կա ստորագրման համար։ «Եթե նրանք պետք է մնան մեր սահմանից ներս, և մենք ինչ–որ փաստաթուղթ ենք ստորագրում, նշանակում է՝ երկու քայլ հետ ենք գնում»,– ասաց նա։

Թագուհի Թովմասյանը նշեց, որ իր անհանգստությունը կապված է նրա հետ, թե ինչ խոստում է տրված մեր կողմից։ «Ես կարծում եմ, որ ՀՀ պաշտպանության նախարարը, ԳՇ պետը ոչ միայն պետք է հեռանան իրենց պաշտոններից, ընդ որում օր առաջ պետք է հեռանան, այլ նրանք ընդհանրապես պետք է պատասխանատվության ենթարկվեն, իրենք պետք է կանգնեն դատարանի առաջ, նախ՝ մեր սահմանների այսօրվա անկազմակերպ, մեր պաշտպանության մակարդակի այսքան ցածր լինելու համար»,– ասաց նա՝ ավելացնելով, որ նրանք պետք է պատասխանատվության ենթարկվեն հայ զինվորին այսքան նսեմացնելու և կրակել–չկրակել որոշում կայացնելու հնարավորությունից նրանց զրկելու համար։

Նա նշեց, թե անխախտ օրենք կա, որ եթե զինվորը տեսնում է սահմանախախտման դեպք, նա պետք է կիրառի հրազեն։ «Այս մարդը բազմաթիվ խոստումներ է, ըստ էության, տվել Ալիևին և այդ խոստումները հիմա իրականացնելու խնդիր է դրված իր առաջ և այդ խոստումները իրականացնելու համար նա պատրաստ է ամեն ինչի, պատրաստ է բոլորիս վրայով գնալ»,– ասաց նա նշելով, որ նկատի ունի Նիկոլ Փաշինյանին։

Նշենք, որ Կառավարության հերթական նիստին Նիկոլ Փաշինյանը հայտարարել է, որ կա քննարկվող փաստաթուղթ։ «Եթե Ադրբեջանն այդ պայմանավորվածությունները իրագործի և այն պայմաններում, ինչ որ խոսել ենք, այո, ես այդ թուղթը ստորագրելու եմ, որովհետև դա 100 տոկոսով համապատասխանում է ՀՀ շահերին, ոչ թե 99 տոկոսով, այլ 100 տոկոսով: Թուղթը չեմ հրապարակի, որովհետև աշխատանքային թուղթը հրապարակելը կոռեկտ չէ»,–ասել է նա։