Ադրբեջանական զինված ուժերի դուրսբերումից հետո միայն պայմաններ կստեղծվեն քննարկումների հնարավորությունը դիտարկելու համար․ ՀՀ ԱԳՆ-ն ներկայացրել է հայկական կողմի դիրքորոշումը

ՀՀ ԱԳՆ-ն Factor.am-ի հարցին ի պատասխան ներկայացրեց Հայաստանի դիրքորոշումը՝ Հայաստանի, Ռուսաստանի և Ադրբեջանի միջև ընթացող բանակցությունների վերաբերյալ։ Factor.am-ը հետաքրքրվել էր՝ արդյո՞ք համացանցում շրջանառվող փաստաթղթի շուրջ է բանակցություններ ընթանում Հայաստանի, Ռուսաստանի ու Ադրբեջանի միջև և արդյոք ՀՀ Արտաքին գործերի նախարարը տեղյակ է եղել է դրա մասին, մասնակցել է այդ փաստաթղթի կազմմանն ու բանակցություններին։ «Հայկական կողմի դիրքորոշումը հստակ է. Հայաստանի Հանրապետության ինքնիշխան տարածքից ադրբեջանական զինված ուժերի դուրսբերումից հետո միայն պայմաններ կստեղծվեն որևէ ձևաչափով և օրակարգով քննարկումների հնարավորությունը դիտարկելու համար»,- ի պատասխան նշեց ԱԳՆ խոսնակ Աննա Նողդալյանը:

Հիշեցնենք, որ Փաշինյանն այսօր Կառավարության նիստի ժամանակ ասաց, որ եթե Ադրբեջանը պայմանավորվածությունը պահի, ապա ինքը կստորագրի փաստաթուղթ, որը, իր ձևակերպմամբ, 100 տոկոս ՀՀ շահերից է բխում։ Թե ինչ փաստաթղթի մասին է խոսքը հայտնի չէ։ Երեկվանից սկսած՝ տարբեր տեղեկություններ են շրջանառվում՝ կապված այդ փաստաթղթի բովանդակության հետ։ Ընդդիմադիր շրջանակներից կան պնդումներ, որ խոսքը տարածքային զիջումների (մասնավորապես՝ Տավուշի մարզի որոշ գյուղերի) մասին է։ ՀՀ էկոնոմիկայի նախարարի պաշտոնակատար Վահան Քերոբյանն այսօր կառավարության նիստից հետո վստահեցրեց, որ այն տարածքային զիջումների մասին չէ և նշեց, որ փաստաթուղթը շուտով կհանրայնացվի։