«Իրավիճակը նույնն է. միանշանակ թշնամին պետք է լքի մեր Հանրապետության սուվերեն տարածքը». Մենուա Հովսեփյան

Մայիսի 12-ից առ այսօր Սյունիքում իրավիճակը նույնն է, թշնամին շարունակում է  տեղակայված մնալ առաջ եկած տարածքներում։

168.am-ի հետ զրույցում Գորիսի քաղաքապետի տեղակալ Մենուա Հովսեփյանն ասաց, որ որևէ փոփոխություն չկա, իրավիճակը շարունակում է նույնը մնալ։

Ինչ վերաբերում է բանակցությունների վերսկսմանը, Մենուա Հովսեփյանը տեղեկացրեց, որ դրանց վերաբերյալ այս պահին որևէ տեղեկատվություն չունի։

«Չեմ կարող ասել, թե ինչ պետք է անենք, սպասում ենք, բանակցություններ են ընթանում։ Ես հիմա չեմ ուզում մեկնաբանություններ տալ հարցի հետ կապված, թե ինչ պետք է անենք։ Միանշանակ թշնամին, թուրքը պետք է լքի մեր Հանրապետության սուվերեն տարածքը, սա միանշանակ է»,- շեշտեց մեր զրուցակիցը։

Ինչ վերաբերում է Վատիկանում նախկին ՀՀ դեսպան Միքայել Մինասյանի հրապարակած փաստաթղթին, որը Նիկոլ Փաշինյանը ստորագրելու է Ալիևի հետ միասին և որը վատ հետևանքներ է ունենալու Հայաստանի համար, Մենուա Հովսեփյանն ասաց, որ այդ փաստաթղթին ծանոթ չէ։

Հիշեցնենք՝ մայիսի 12-ին թշնամին խախտելով հայ-ադրբեջանական սահմանը՝ մի քանի կիլոմետր Սյունիքի, Գեղարքունիքի մարզերի հատվածներում առաջ է եկել, մինչ օրս նրանք առաջ եկած հատվածներում են և հետ չեն գնում։ Սյունիքում մի քանի անգամ անցկացվել են բանակցություններ, որպեսզի թշնամին հետ գնա, սակայն ապարդյուն։ Հարակից գյուղերի ղեկավարներն ու բնակիչներն ասում են, որ թշնամու զինվորներն ինչ-որ քարտեզներով են առաջ եկել, և պնդում են, թե վերադասից հրաման են ստացել, որ առաջ գան, քանի որ համարում են, որ այդ տարածքներն ադրբեջանական են։