«Ինձ հասած տեղեկություններով` նման բան չի եղել». Թագուհի Թովմասյանը՝ Վարդենիսում տեղի ունեցած ծեծկռտուքի լուրերի մասին

«Դեժավյու» տելեգրամյան ալիքը քիչ առաջ հայտնել էր, որ ադրբեջանցիները կրկին առաջ են շարժվել դեպի Վարդենիս և այնքան են մոտեցել հայկական բնակավայրին, որ դեմ դիմաց հանդիպել են տեղացիների։

«Վարդենիսցիները երբ սկսել են իրենց հետ բանակցել, թե՝ այս ուր եք եկել, հետ գնացեք, սա Հայաստանն է, ադրբեջանցիները հակառակն են պնդել և վեճի բռնվելով՝ ծեծի են ենթարկել վարդենիսցի բնակիչներին։ Ծեծված վարդենիսցիները, երբ տեղի իշխանությանը ահազանգել են, որ ադրբեջանցիները էլ ավելի են մոտեցել իրենց բնակավայրին ու ծեծի ենթարկել իրենց, տեղի իրավապահները կապ հաստատելուց հետո Երևանի հետ, հրահանգ են ստացել՝ ոչինչ չանել, թող մնան այնտեղ, ուր հասել են։ Փաստացի, ադրբեջանցիները որքան մոտեցել են, այնտեղ էլ դեռ մինչ այս պահը տեղակայված են, չնայած որ Հայաստանի Հանրապետության տարածքում են, անգամ տեղացի հայերի են ծեծի ենթարկել»,- գրել էր տելեգրամյան ալիքը։

168.am-ը ԱԺ անկախ պատգամավոր Թագուհի Թովմասյանից հետաքրքրվեց, թե ի՞նչ իրավիճակ է Վարդենիսում, և այս տեղեկությունը որքանո՞վ է համապատասխանում իրականությանը։

Մեզ հետ զրույցում պատգամավորը հերքեց լուրը՝ ասելով․

«Ինձ հասած տեղեկություններով՝ նման բան չի եղել։ Այսօրվա ընթացքում որևէ տեղաշարժ չի եղել, այսինքն՝ իրենց կողմից առաջընթաց չի եղել»։

Հիշեցնենք՝ մայիսի 12-ին թշնամին խախտելով հայ-ադրբեջանական սահմանը՝ մի քանի կիլոմետր Սյունիքի, Գեղարքունիքի մարզերի հատվածներում առաջ է եկել, մինչ օրս նրանք առաջ եկած հատվածներում են և հետ չեն գնում։

Սյունիքում մի քանի անգամ անցկացվել են բանակցություններ, որպեսզի թշնամին հետ գնա, սակայն ապարդյուն։ Հարակից գյուղերի ղեկավարներն ու բնակիչներն ասում են, որ թշնամու զինվորներն ինչ-որ քարտեզներով են առաջ եկել և պնդում են, թե վերադասից հրաման են ստացել, որ առաջ գան, քանի որ համարում են, որ այդ տարածքներն ադրբեջանական են։