Փոլ Գոբլ. «ԱՄՆ-ն պետք է աջակցի Թուրքիային` տարածել իր ազդեցությունը ԱՊՀ թուրքալեզու երկրների վրա»

Ինչպես հայտնի է, Փոլ Գոբլը 90-ականներին աշխատում էր ԱՄՆ պետդեպարտամենտի հատուկ խորհրդականի կարգավիճակում: Լինելով միաժամանակ այս երկրի կենտրոնական հետախուզական կառույցի վերլուծաբան, Առաջին արցախյան պատերազմի ժամանակ հենց ինքն էր առաջարկում փոխանակել Հայաստանի Մեղրիի տարածքը Արցախի հետ: Նրա առաջարկները, բնականաբար, մերժվեցին, սակայն իր պատկերացումները մնացին մեր տարածաշրջանում ԱՄՆ քաղաքականության հիմքում:

Այսօր արդեն Գոբլը, որն աշխատում է Ռուսաստանի և Եվրասիայի հարցերով փորձագետ, խորհուրդ է տալիս ԱՄՆ նախագահ Ջո Բայդենի վարչակազմին ակտիվորեն աջակցել Թուրքիային` տարածելու իր ազդեցությունը Կովկասում և Միջին Ասիայի երկներում: Մասնավորապես, թուրքական լրատվամիջոցներից մեկին տված հարցազրույցում նա նշել է բառացիորեն հետևյալը. «ԱՄՆ-ի ազդեցիկ շրջանակները շատ լավ հասկանում են, որ Անկարան Վաշինգտոնի համար անփոխարինելի դաշնակից է: Դիտեք քարտեզը և հիշեք ՆԱՏՕ-ի պատմությունը, և ամեն ինչ ձեզ համար պարզ կդառնա, քանզի Թուրքիայի աշխարհագրական դիրքը հուշում է, որ նման դաշնակից ԱՄՆ-ն չունի: Իսկ այն խոսակցությունները, թե իբր Թուրքիային կարող է փոխարինել Հունաստանը, հիմք չունեն, քանզի Կրետեի ռազմակայանը երբեք չի փոխարինի Ինջիրլիքի նշանակությունը: Իսկ C-400-ների ձեռքբերումը չպետք է լուրջ ազդեցություն թողնի ԱՄՆ-Թուրքիա փոխհարաբերությունների վրա»:

Փոլ Գոբլը չի մոռացել նաև Էրդողանի նպատակները` Սև և Մարմարա ծովերի միջև նոր միջանցք բացելու հարցի վերաբերյալ: Ըստ Փոլ Գոբլի` եթե դա կյանքի կոչվի, ապա Թուրքիայի նշանակությունն է՛լ ավելի կմեծանա, քանզի Անկարան հնարավորություն կունենա շրջանցել Մոնտրեի համաձայնագիրը, որոնք սահմանափակում են ԱՄՆ-ի և ՆԱՏՕ-ի անդամ հանդիսացող մյուս երկրների նավատորմերի մուտքը դեպի Սև ծով:

Ինչ վերաբերվում է թուրք-իսրաելյական հարաբերությունների իբր վատթարացմանը, ապա Գոբլը հիշեցնում է, որ դա փիարից այն կողմ չի գնա, քանզի այդ վատթարացումը շահավետ չէ ո՛չ Իսրաելին, ո՛չ Թուրքիային: Ըստ Գոբլի` ԱՄՆ-ին խանգարում է Թուրքիայի հետ հարաբերությունների սենտիմենտալ կողմը, և ժամանակն է, որ Բայդենի վարչակազմը հրաժարվի այդ ամենից և իսկապես գործունյա դաշնային հարաբերություններ հաստատի Թուրքիայի հետ:

Zham.am