«Անհրաժեշտության դեպքում գործողություններ կձեռնարկվեն ՀԱՊԿ դրույթների և կանոնակարգի համաձայն». ՀԱՊԿ խոսնակը՝ Սյունիքում ստեղծված իրավիճակի մասին
ՀԱՊԿ-ն ուշադրությամբ հետևում է Հայաստանի Սյունիքի մարզի սահմանամերձ շրջաններում իրավիճակի զարգացմանը։ Այս մասին Tert.am-ի հետ զրույցում ասաց ՀԱՊԿ-ի մամուլի խոսնակ Վլադիմիր Զայտենդինովը։
«ՀԱՊԿ-ում ՀՀ մշտական և լիազոր ներկայացուցիչ Վիկտոր Բիագովը այս տարվա մայիսի 13-ին ՀԱՊԿ մշտական խորհրդի նիստի ժամանակ տեղեկացրել է մայիսի 12-ին Ադրբեջանի Հանրապետության հետ Հայաստանի Հանրապետության պետական սահմանին տեղի ունեցած միջադեպի մասին: Ըստ հայկական կողմի՝ Ադրբեջանի զինված ուժերը խախտել են սահմանը և մի քանի կիլոմետր ընկղմվել հայկական տարածք»,- նշեց նա։
Ըստ խոսնակի՝ ՀԱՊԿ գլխավոր քարտուղար Ստանիսլավ Զասը հեռախոսազրույցներ է ունեցել Հայաստանի պաշտպանության նախարարի ժամանակավոր պաշտոնակատար Վաղարշակ Հարությունյանի և ԱԳ նախարարի ժամանակավոր պաշտոնակատար Արա Այվազյանի հետ՝ քննարկելով հայ-ադրբեջանական սահմանին ստեղծված իրավիճակը:
«ՀԱՊԿ-ը ուշադիր հետևում է Հայաստանի Սյունիքի մարզի սահմանամերձ շրջաններում տեղի ունեցող իրադարձությունների զարգացմանը: Իրավիճակի զարգացմանը զուգահեռ անհրաժեշտության դեպքում գործողություններ կձեռնարկվեն Հավաքական անվտանգության մասին պայմանագրի դրույթների և ՀԱՊԿ կանոնակարգի համաձայն»,- ասաց Վլադիմիր Զայտենդինովը։
Հիշեցնենք, որ ՀԱՊԿ-ում Հայաստանի Հանրապետության մշտական և լիազոր ներկայացուցիչ Վիկտոր Բիյագովը մանրամասն ներկայացրել է Հայաստանի Հանրապետության Սյունիքի մարզի տարածքում ադրբեջանական կողմի հրահրած սադրիչ գործողությունները և դրանց հետևանքով ստեղծված իրադրությունը:
Հետևեք մեզ Facebook-ում